УИХ-ын гишүүн асан Б.Ундармаад холбогдох хэргийн шүүх хурал Баянзүрх дүүргийн Эрүүгийн хэргийн анхан шатны шүүх танхимд энэ сарын 10-нд 09.00 цагаас товлогдлоо.

Нийслэлийн прокурорын газраас Эрүүгийн хуулийн ерөнхий ангийн 3.1 дүгээр зүйлийн 2, 3.4 дүгээр зүйлийн 1 дэх хэсэгт заасныг тус тус журамлан мөн хуулийн тусгай ангийн 22.1 дүгээр зүйлийн 3 дахь хэсэгт заасан зүйл ангиар яллах дүгнэлт үйлдээд буй юм.

Түүнийг Жижиг, дунд үйлдвэрлэлийг хөгжүүлэх сангаас хөрөнгө “Доктор МЭИК” компаниараа дамжуулан 700 сая төгрөгийн зээл авсан хэрэгт холбогдуулан 2018 оны арванхоёрдугаар сараас Авлигатай тэмцэх газар шалгасан байдаг. ЖДҮХС-аас хямд хүүтэй зээл авч мөнгө угаасан байж болзошгүй хэргээр Г.Солтан, Д.Дамба-Очир, Б.Ундармаа, Л.Энхболд нарыг холбогдуулан шалгасан бөгөөд Г.Солтанд гурван жилийн хорих ял, Д.Дамба-Очирыг шүүхийн үйл ажиллагаанд саад учруулсан гэх үндэслэлээр цагдан хориод байгаа билээ.

А.Сүх