УИХ-ын хаврын ээлжит чуулганаар хэлэлцэж, баталсан нэг зүйл нь Төрийн тусгай хамгаалалтын тухай хуульд нэмэлт, өөрчлөлт оруулах тухай хууль. Өмнөх парламентын бүрэн эрхийн хугацаанд, сонгуулийн чимээ айлсахтай зэрэгцэн яаран баталсан уг хуулийн төсөлд хэд хэдэн онцлох заалт бий.

Өнгөрсөн зургадугаар сард багтаан хуулийн хэрэгжилтийг зохион байгуулахаар зохицуулсан нэмэлт, өөрчлөлтөөр Тагнуулын ерөнхий газрын дэргэд байсан Төрийн тусгай хамгаалалтын газрыг бие даасан агентлаг болгон өөрчилсөн юм.

Харин удирдлагыг нь Ерөнхий сайд Үндэсний аюулгүй байдлын зөвлөлд санал болгож, Ерөнхийлөгч, УИХ-ын даргатай зөвшилцсөнөөр Засгийн газар томилж, чөлөөлөхөөр тусгасан. Мөн тус байгууллагын орон тоо, төсвийг төрийн нууцад хамааруулж, Засгийн газраас тогтоох юм. Төсвийг нь Тусгай хяналтын дэд хороо хянаж, санал болгосноор УИХ-аар батална.

Өөр нэг онцлох заалт нь Төрийн тусгай хамгаалалтын газрын удирдах албан тушаалтанд цэргийн цол олгохоор хуульчилсан юм. Өөрөөр хэлбэл, одоогийн дарга П.Батаа цэргийн дээд цол болох генералын мөрдэс зүүх боломжтой гэсэн үг.

Өмнө нь Ерөнхийлөгч, УИХ-ын дарга, Ерөнхий сайдаар ажиллаж байсан албан тушаалтны бүрэн эрхийн хугацаа дууссанаас хойш нэгэн бүрэн эрхийн буюу дөрвөн жилийн хугацаанд төрийн тусгай хамгаалалтад байх зохицуулалттай байв.

Харин нэмэлт, өөрчлөлтөөр Ерөнхийлөгч гурав, УИХ-ын дарга, Ерөнхий сайд хоёр жилийн хугацаанд төрийн тусгай хамгаалалтад байхаар болжээ.

Хуульд зааснаар төрийн тусгай хамгаалалтад байхаар тогтоосон УИХ-ын чуулган, Засгийн газар, Үндэсний аюулгүй байдлын зөвлөлийн хуралдаан, олон улсын дээд хэмжээний уулзалт, хэлэлцээр, хурал, зөвлөгөөн явагдах танхим, хамгаалуулагчийн ордон, өргөө, зориулалтын орон сууц, тээврийн хэрэгсэл болон түр байрлах орон байр, албан тасалгаанд техникийн үзлэг, шалгалт хийх бөгөөд үзлэг, шалгалт хийх зөвшөөрлийг ТТХГ-ын дарга олгох юм.

Г.Эрхэс