"Боловсролын салбар дахь цахим шилжилт" хэлэлцүүлэг Төрийн ордонд болж байна.
Энэ үеэр БСШУС-ын сайд Л.Цэдэвсүрэн “Боловсролын салбарыг ирээдүйд хэрхэн цахим тогтолцоо руу шилжүүлэх талаар хэлэлцэж байгаа нь энэ хэлэлцүүлгийн онцлог юм. Бидний зүгээс хичээл сургуулийнхаа үйл ажиллагааг цахим болон танхимаар явуулахаар бэлтгэл ажлаа ханган ажиллаж байна.
Монгол Улс H1N1 вирусний халдварын үед нэг сарын хугацанд цахим хэлбэрээр хичээл сургуулийн үйл ажиллагаагаа өмнө нь явуулж байсан. Гэхдээ тухайн хичээл цахим сургалт биш байсан юм шиг байна.
Багш нарыгаа цахимаар хичээл хийх арга зүй технологид сургах шаардлагатай бий. ЕБС-ийн одоогийн түвшинд байгаа мэдээлэл технологийн бааз суурийг сайжруулах, интернетийн хурд нь төдийлөн шаардлага хангахгүй байгаа нь өнгөрсөн хугацаанд ажиглагдсан. Эдгээр асуудалд нэн тэргүүнд анхаарах шаардлагатай гэж үзэж байна.
Дээд боловсролын салбарт сургуулиуд цахим сургалтын платформд төдийлөн сайн ороогүй байна. Нэгдсэн систем байхгүйгээс сургууль бүр өөрсдийн дотоод сүлжээнд суурилсан онлайн хичээл өнгөрсөн хугацаанд явууллаа.
Бид өнгөрсөн хугацаанд хийж хэрэгжүүлсэн ажлаа дүгнээд эхний ээлжинд цахим орчинд боловсрол олгох эрх зүйн орчныг бий болгох ёстой гэж үзсэн.
Мөн нэгдсэн платформыг боловсролын бүх салбарт бий болгох ёстой. Олон улсын жишигт нийцсэн сургалтын нэгдсэн стандарт, аргачлалыг бий болгох шаардлагатай байна” гэлээ.
А.Сүх
