Ирэх аравдугаар сард явуулах Орон нутгийн сонгуулийн үр дүнгээс АН-ын даргын үүрэг гүйцэтгэгч Ц.Туваан намаа үргэлжлүүлэн удирдах эсэх нь тодорхой болох нь. Учир нь, Ардчилсан намын Үндэсний бодлогын хорооноос ийм шийд гаргажээ. Я.Санжмятавын зохион байгуулалтад орсон АН УИХ-ын ээлжит сонгуульд шинэ боловсон хүчнээ нэр дэвшүүлж, хүч сорьсон.

Гэвч олонх болох хүлээлттэй тэдний хүсэл талаар болж, иргэдийн сонголтоор өмнөхөөс нь хоёрхон суудлыг илүү өгсөн юм. 

Сонгуульд ялагдал хүлээсэн учраас Намын дүрмийн дагуу С.Эрдэнэ суудлаасаа огцорч, Ц.Туваанд эрх мэдлийг атгуулсан нь саяхны явдал. АН-ын дараагийн дарга хэн болох асуулт иргэд чих тавин чагнаж сууна. АН даргагүй болохтой зэрэгцэн Намын даргад өрсөлдөхөө зарим гишүүд нь илэрхийлээд амжсан. АН-ын даргын суудал хэнд очихоос Намын цаашдын хувь заяа, шинэчлэл шалтгаална. Тэгвэл Намын даргын суудлын төлөө өрсөлдөх хүн хэн бэ. Одоогийн үүрэг гүйцэтгэгч Ц.Туваан Намын даргын ажлыг цааш үргэлжлүүлэхээр хүч үзэх нь тодорхой. Хэрэв Ц.Туваан Намын даргаар үргэжлүүлэн ажиллабал АН-д шальтай өөрчлөлт орохгүй. Шалтгаан нь С.Эрдэнийн хүн.

Дараагийн нэр дэвшихээ нийтэд ил зарласан хүн бол УИХ-ын гишүүн  асан Ц.Оюунгэрэл. Түүнийг Соёл, спорт, аялал жуулчлалын сайд байснаар нь иргэд андахгүй. Улс төрд нөлөөтэй, чадварлаг, манлайлагч эмэгтэйчүүдийн тоонд багтдаг түүнийг дэмжигч Намын залуус ч их юм байна лээ. Магад АН-ын дараагийн дарга эмэгтэй хүн ч байж болох. 

Юутай ч АН асуудалд ул суурьтай хандаж, алдаа оноогоо ирэх арваннэгдүгээр сарын 16-нд болох Их хурлаараа дэнсэлж, тодорхой болгох учиртай. Харин энэ хүртэлх хугацаанд орон нутаг, дунд шатны Намын байгууллагуудаа дэмжиж, сонгуульдаа амжилттай оролцъё гэдэг байр суурин дээр олонхи нь санал нэгдсэн байна.

Эндээс үзвэл Ц.Туваан бүр цаашилбал С.Эрдэнэ нар Орон нутгийн сонгуульд хэр оролцохоос хамаарч байр сууриа хадгалж үлдэх эсэх нь шийдэгдэх нь.

Б.Лхам