Эрүүл мэндийн яамнаас коронавирусний халдварын нөхцөл байдлын талаар ээлжит мэдээллээ хийлээ.

Энэ үеэр ковид-19 халдварын шинжилгээний талаар ХӨСҮТ-ийн тандалт, судалгааны албаны дарга А.Амбасэлмаа мэдээлэл өглөө. Тэрбээр "Энэ сарын 10-нд ХӨСҮТ-ийн вирус судлалын лаборатори, Дархан-Уул аймгийн салбар лабораторид нийт 504 хүнд шинжилгээ хийсэн. халдвар нэмж бүртгэгдээгүй. 

Тодруулбал, долдугаар сарын 27-нд Франкфуртаас ирсэн 266 хүний давтан шинжилгээ, долдугаар сарын 22-нд Австралийн онгоцоор ирсэн Оюутолгойн 48 ажилтны шинжилгээ, ажиглах байруудад ажиллаж байсан эмч, эмнэлгийн 32 ажилтны шинжилгээ, эдгэрээд сувилалд тусгаарлагдаж буй 43 хүний давтан, тусгаарлан ажиглах байранд тусгаарлагдсан 11 хүний давтан, Дархан-Уул аймгийн нэгдсэн эмнэлэгт тусгаарлагдсан зургаан хүний давтан, Алтанбулагийн боомтоор орж ирсэн ачаа тээврийн 28 жолоочийн шинжилгээ, Алтанбулагийн боомтоор орж ирж, Дархан, Орхон аймагт тусгаарлагдсан 70 хүний шинжилгээ, Сэлэнгэ, Дорноговь аймгийн Замын-Үүд суманд тусгаарлагдсан хоёр хүний шинжилгээ хийсэн. 

Өнөөдрийн байдлаар манай улсад батлагдсан коронавирусний 293 тохиолдлоос 263 хүн эдгэрсэн. Эдгэрсэн хүмүүсээс 44 нь сувилалд, 26 нь гэртээ тусгаарлалтад байгаа бол 193 хүний ажиглалт тандалтын хугацаа нь дууссан" гэлээ. 

А.Сүх