УОК-ын Шуурхай штабаас цаг үеийн асуудлаар мэдээлэл хийлээ.

Энэ үеэр Гадаад харилцааны яамны Консулын газрын дарга Л.Мөнхтүшиг "Цар тахлын хугацаанд УОК-ын шийдвэрээр хилийн чанадад байгаа монгол иргэдээ тасралтгүй татан авах ажиллагааг зохион байгуулж буй. Олон улсын шилжилт хөдөлгөөний байгууллагатай хамтран ажиллах боломжийг бид өнгөрсөн дөрөвдүгээр сараас судалж эхэлсэн. Ингээд хоёр талын хамтын ажиллагааны үр дүнд өнөөдөр 185 иргэнийг эх оронд нь авчирч, тусгаарлалтын зардлыг гаргаж байна.

Мөн Истанбулд байгаа нөхцөл байдал нь хүндэрсэн иргэдийг ойрын хугацаанд авчрахаар ажиллаж байна" гэлээ.

Манай улс 2008 оноос эхлэн уг байгууллагатай хамтран ажиллаж байгаа аж.

Олон улсын шилжилт хөдөлгөөний байгууллагын ажилтан Р.Оюунбилэг “Манай байгууллага 2011 онд монгол Улсад өөрийн салбарыг үүсгэн байгуулснаас хойш 2496 иргэнд нутаг буцах тэтгэлэг хүргэж ажилласан. Нийт 6200 гаруй иргэдийг эх оронд нь авчирсан. 

Өнөөдөр 185 иргэн бол энэ тэтгэлгийн нэгээхэн хэсэг болж эх орондоо эргэн ирж байна. Энэ удаагийн нислэг Чех улсаас эх орондоо буцах хүсэлт гаргасан иргэдээс нэн тэргүүнд буцаах шаардлагатай иргэд хамрагдсан.

Нийт 7.3 тэрбум төгрөг зарцуулсан. Үүнд тийз болон тусгаарлалтын мөнгө. Мөн иргэн гэртээ тусгаарлагдах үед тодорхой хэмжээний санхүүгийн дэмжлэг үзүүлэх мөнгө багтсан. Ингээд тооцооллын дагуу нэг иргэнд 7.3 сая төгрөг зарцуулж буй юм.  

Мөн бусад оронд байгаа иргэдэд хэрхэн туслах талаар яригдаж байгаа. Одоогоор тодорхой шийдвэр гараагүй байна. Бидний зүгээс аль болох Гадаад харилцааны яамдаа туслахын төлөө ажиллана" гэсэн юм. 

А.Сүх