ЭХЭМҮТ болон МҮИС-ийн хоорондын газрын маргааны асуудал үргэлжилж байна. Тодруулбал, өнгөрсөн баасан гарагт Эх хүүхдийн эрүүл мэндийн үндэсний төвийн зүүн урд байрладаг Монголын үндэсний их сургуулийнхан эмнэлгийн эзэмшил газар руу халдахыг завдсан талаар эмнэлгийнхний зүгээс шүүхэд хандаад буй.
Уг асуудалтай УИХ-ын гишүүн Ж.Чинбүрэн болон хотын даргын үүргийг түр орлог гүйцэтгэгч Ж.Батбаясгалан нар танилцаж, газрын маргааны асуудлыг яаралтай шийдвэрлэхийг холбогдох байгууллагуудад үүрэг өгсөн юм.
Энэ тухай УИХ-ын гишүүн Ж.Чинбүрэн өөрийн цахим хуудастаа "Эмнэлгийн алхам газрыг ч хамгаална. Эх, хүүхдийн эрүүл мэндийн үндэсний төвийн эмч, сувилагч нар эмнэлгийн газраа хамгаалахад туслаач гэж итгэж найдаж надад хандсан. Улсын эмнэлэгт асрагчаас захирал хүртэл 30 жил ажилласан, жаргал, зовлон нэгтэй эмчийн хувьд, эрүүл мэндийн салбараа төлөөлөх үүргийнхээ дагуу газрын дээрмийг зогсоохоор очиж ажиллалаа.
Газар дээр нь очиж, хурдан шуурхай шийдвэр гаргасан Нийслэлийн засаг даргын үүрэг гүйцэтгэгч Ж.Батбаясгаланд эмч, сувилагч, эх хүүхдүүдийн өмнөөс талархал илэрхийлье!
Хувийн дээд сургууль өргөтгөл барихдаа эмнэлгийн газрыг дур мэдэн авсан байсныг эмч, сувилагч нартайгаа хамтдаа тэмцэн байж зогсоолоо. Хувийн хэвшлийг хүндэтгэх ёстой. Гэхдээ хувь, хувьсгал бүгд л хуулийн дор ажиллах үүрэгтэй.
Өнөөдрийн үйл явдал бол нэг эмнэлгийн биш нийтлэг асуудал болж ужгирсан. Улсын эмнэлэг, сургууль, цэцэрлэг, тоглоомын талбай, ногоон байгууламжийн газрыг хууль бусаар авч, барилга байшин босгочихоод улс төр, хууль шүүх, хэвлэл мэдээлэл, элдэв янзаар далайлган сүрдүүлж дээрмээ хамгаалдаг.
Улсаас эмнэлэг, сургууль, цэцэрлэг, зам, ногоон байгууламж, дэд бүтэц барих гэхээр газар олддоггүй. Нэг хүнд оногдох газар нутгаар дэлхийд дээгүүр ордог манай улсын нэг эмгэнэл нь энэ шүү дээ. Манай ХСҮТ-ийн газрыг 20-иод жилийн өмнөөс тастаж авсаар бүслэлтэнд ажиллаж байна. Яаралтай тусламж үзүүлэхэд гарц, орцыг ч таглаж бөглөснийг эхнээс нь чөлөөлж байгаа.
Эрүүл мэндийн салбарын 53 мянган ажилтны эрх ашиг бол 3 сая гаруй монгол хүний амь насны асуудал юм шүү. Эмч, сувилагч нарыг өмөөрөх төр засаг, өмгөөлөх түмэн олон нь бий гэдгийг сануулъя!" гэжээ.
Сэтгэгдэл (10)