Засгийн газрын ээлжит хуралдаанаар Пэлжээгийн Одонбаатарыг Тагнуулын ерөнхий газрын тэргүүн дэд даргаар томилжээ.

П.Одонбаатар нь Дундговь аймгийн харьяат. Цэргийн байгууллагад нийт 25 жил ажилласан, цэргийн хурандаа цолтой нэгэн. Тэрбээр 1996-1999 онд Дундговь аймгийн Засаг даргын дэргэдэх Цагдаагийн хэлтэст мөрдөн байцаагч, 1999-2001 онд Улсын аюулгүй байдлыг хангах ерөнхий газрын Мөрдөн байцаах хэлтэст мөрдөн байцаагч, 2001-2015 онд Тагнуулын ерөнхий газрын Мөрдөн байцаах хэлтэст ахлах мөрдөн байцаагч, тасгийн дарга, хэлтсийн орлогч дарга, хэлтсийн даргаар ажиллажээ. 

П.Одонбаатар нь 2018-2019 онд Тагнуулын ерөнхий газрын албаны даргаар ажилласан байдаг. Харин 2019 оноос Тагнуулын ерөнхий газрын Орон нутгийн газрын даргаар томилогдон ажиллажээ.

Тагнуулын ерөнхий газар нь хуулиараа Ерөнхий сайдын харьяанд багтдаг. Тус газрын Тэргүүн дэд даргаар ажиллаж байсан бригадын генерал Б.Доньжчимбууг 2017 онд үүрэгт ажлаас нь чөлөөлснөөс хойш тус албан тушаал эзэнгүй явж ирсэн юм.

С.Сүлд