Ерөнхий сайд У.Хүрэлсүх өнөөдөр дөрвөн улсын Элчин сайдыг хүлээн авч уулзах тов гарчээ. Тэдгээрт нь АНУ, Япон, БНСУ, БНХАУ зэрэг тэргүүтэй орны Элчин сайдууд багтсан байна.

АНУ-ын Элчин сайд М.Клеческийг УИХ-ын дарга Г.Занданшатар хэд хоногийн өмнө хүлээн авч уулзах үеэр зэс хайлуулах үйлдвэр барих, ногоон хүлэмж байгуулах зэрэг томоохон төслүүдэд хамтран ажиллахаа илэрхийлсэн юм. Үүнээс гадна АНУ-ын Засгийн газраас иргэний нийгэм, улс төрийн үйл явц дахь залуучууд, эмэгтэйчүүдийн үүрэг оролцоог бэхжүүлэх “Залуучууд, эмэгтэйчүүдийн сонгууль, улс төрийн оролцоог идэвхжүүлэх нь” хөтөлбөр албан ёсоор хэрэгжүүлж эхэлсэн тухайгаа парламентын спикерт учирласан удаатай.

Харин БНСУ-аас Монгол Улсад суугаа Элчин сайд Ли Ё Хун “Солонгосын жуулчдын статистик тоог харвал БНХАУ, ОХУ-ын дараа Монгол руу хамгийн их зорчдог. Иймээс  хоёр улсын иргэд хоорондын харилцааг улам идэвхжүүлэх, Солонгос иргэд Монголд визгүй зорчдог болох тухайд УИХ-ын даргын хувьд хүчин чармайлт гарган ажиллана гэдэгт найдаж байна” хэмээсэн байдаг.

БНХАУ-ын Элчин сайд Чай Вэнрүй ч УИХ-ын сонгуулийн дараахан Г.Занданшатар даргатай уулзах үеэр хоёр улсын худалдаа, эдийн засгийн хамтын ажиллагааг сэргээн идэвхжүүлэх шаардлагын талаар ярилцаж, Монголбанк, Хятадын Ардын банктай хийсэн своп хэлцлийн хугацааг сунгах, хоёр орны худалдаа эдийн засгийн урт хугацааны хамтын ажиллагааг хөгжүүлэх зэрэг тодорхой асуудлаар санал солилцсон юм.

Эндээс сонгуулийн үр дүнгээр дахин үнэмлэхүй олонхиор засаглаж эхэлсэн МАН буюу одоогийн УИХ, Засгийн газартай дэлхийн томоохон улс орнууд илүү өргөн цар хүрээнд хамтран ажиллахаа парламентын спикертэй нь түрүүлж уулзах замаар Элчин сайдуудаараа  дамжуулан илэрхийлж эхэлсэн гэдгийг харж болохоор. 

Өөрөөр хэлбэл, АНУ-тай зэс хайлуулах үйлдвэр барих эсэх асуудалд хамтрах, БНСУ-ын талаас тавьсан визгүй зорчуулах зэрэг тэдний саналд Монгол Улсын Засгийн газар ямар хариу өгөх эсэх нь Ерөнхий сайд У.Хүрэлсүхийн албан уулзалтаас тодорхой болох нь. 

Г.Эрхэс