Үндэсний их баяр наадамд шөвгөрсөн бөхчүүдийн дундаас допинг хэрэглэсэн гэх гурван бөхийн асуудал анхаарал татаж байгаа. Өчигдөр улсын аварга Н.Батсуурь ард түмнээсээ уучлалт гуйснаар бөхчүүдэд үлгэр жишээ жишиг тогтоолоо. Үүнээс өмнө  допинг хэрэглэсэн хэмээх 25 бөх хориотой эм хэрэглэснээ хүлээн зөвшөөрөөгүй бөгөөд асуудалд арай өөрөөр ханддаг байв. Энд нэг зүйлийг онцлоё. Залуу аварга маань үндэсний бөхөөр хичээллэхээсээ өмнө жүдогоор олон улсын чанартай тэмцээн уралдаанд бишгүй оролцож, допингийн шинжилгээ өгч сурсан тамирчин. Түүнийг допинг хэрэглэсэн гэх мэдээлэл анх цацагдахад үнэмших хүн цөөн байсан. Тэгвэл аваргыг мэдээлэл хийсний дараахан түүнтэй мөр зэрэгцэн их спортын талбарт нэг жинд өрсөлдөж явсан өрсөлдөгч нь сэтгэгдлээ ийн бичжээ.

Аварга ахтай 10 жил хамт өрсөлдөж, бэлтгэл хийж, бөх хүний сэтгэл зүйг нь шүтэж, энэ хүний бодол толгойгоор барилдаж үзэх юмсан гэж мөрөөдөж, үлгэр дуурайлал авч явдаг хүний хувьд 10 жил өрсөлдсөн нэг жингийн тамирчин хүний хувьд хэлэхэд Батсуурь аварга яасан ч хор хэрэглэх ухаан муутай хүн биш. Илэрсэн гэгдэж байгаа бодис нь хүнд тамир тэнхээ оруулдаггүй, гадуур 400 төгрөгөөр борлуулагддаг энгийн нэг зүрхний эм, манай бөхчүүдээс илэрч байсан (анаболик, стероид, станазол) гэх мэт бодисоос тэс өөр зүйл гэдгийг авч үзээ ид яваа аваргыг 100 жилийн ойд барилдаж болохоор шийтгэл өгөөсэй гэж чин сэтгэлээсээ хүсч байна.

Ө.Дүүрэнбаярын дэвшүүлсэн шийтгэл хөнгөлүүлэх асуудал үндэсний бөхөд өмнө нь гарч байсан. Тухайлбал, дархан аварга А.Сүхбат, Д.Батбаяр, Г.Эрхэмбаяр, Б.Соронзонболд нарт ямар нэгэн шийтгэлийн арга хэмжээ авсан нь дуулдаагүй. Тэр бүү хэл саяхан Б.Соронзонболд заан допингийн асуудалд хоёр дахиа нэр холбогдоход үндэсний бөхийн холбоо толгойг нь илээд өнгөрсөн билээ. Тэгвэл харцага Г.Алтангэрэл, Ч.Цогбаяр нарыг алдаагаа ухамсарласан хэмээн шийтгэлийнх нь хугацааг багасгасан. Улсын начин Б.Баатарцолын барилдах эрхийг нэг жил болгож, Б.Сугаржаргалын барилдах эрхийг зургаан сараар хасч байсан удаатай.