Ерөнхий сайд асан Ж.Эрдэнэбат нарт холбогдох хэргийн Давж заалдах шатны хуралдаан нийслэлийн шүүхэд өглөө 09.00 цагт хуваарийн дагуу эхэлсэн ч Сүхбаатар дүүрэгт цахилгааны хязгаарлалт хийснээс шүүхийн тог тасарчээ.

Тиймээс шүүх хуралдааныг 14.00 цаг хүртэл түр завсарлуулаад байна. Хуралдаанд шүүгдэгч Ж.Эрдэнэбат хорих ангиасаа онлайнаар оролцож байгаа юм. Улс төрд нөлөө бүхий этгээд өөртөө болон бусдад давуу байдал бий болгож, эрх мэдэл, албан тушаалын байдлаа ашиглан гэмт хэргийн зохион байгуулагчаар хамтран оролцсон гэм буруутайд тооцон Ж.Эрдэнэбатад Сүхбаатар дүүргийн Эрүүгийн хэргийн анхан шатны шүүхээс нийтийн албанд томилогдох эрхийг зургаан жилээр хасч, зургаан жилийн хорих ял ногдуулсан билээ.

Харин анхан шатны шүүхийн шийдвэрийг яллагдагч Ж.Эрдэнэбат болон түүний өмгөөлөгч үл зөвшөөрөн Давж заалдах шатны шүүхэд гомдол гаргаснаар өнөөдөр ийн хэлэлцэж байгаа юм.