“Монгол бөхийн дэвжээ ёс бусын юмаар сэвтэх ёсгүй”. Бидний үзэх дуртай нэгэн хуучны кинон дээр ингэж хэлдэг. Энэ үгийг чухамхүү шударга барилдаарай хэмээн хойч үедээ хэлж захьсан үнэт сургаал гэж ойлгодохоор. Орчин цагт энэ үгийн мөн чанар ихэд өгүүлэгдэж буйг уншигч та бүхэн мэдэх буйзаа. Нэгэн жишээ хэлье.

Төрт ёсны Баяр наадмын хүчит бөхийн барилдаанд ахмад настай болон том цолтой бөхчүүд маань их хэмжээний мөнгө аваад хариуд нь эрх гөлөг шиг худал хэвтэх нь түгээмэл болсон. Энэ талаар олон хүн хэлж, шүүмжилдэг ч өөрчлөлт, шинэчлэлт огт ороогүй.

Түмэн олны өмнө бидний хайрлан хүндэтгэдэг цуут бөхчүүд минь ичгүүр сонжуураа алдан том цүнхтэй мөнгийг баруун солгойгүй солилцох нь таагүй сэтгэгдэл төрүүлдэг байсныг энд нуух юун. Ил цагаандаа гарна гэдэг л энэ. Одоо цаг өөрчлөгдөж. Техник технологи хөгжсөнөөр тэдний арга нарийсч, олихоогүй муухай ажлаа гар утас, интернет банкиар хийж гүйцэтгэж байна.

Энэхүү бохир ажиллагаанд нутгийн зөвлөл, ивээн тэтгэгч компани, нутгийн нөлөө бүхий бөхчүүд манлайлан оролцох нь элбэг.

Нэгэн наадмын ам авах байдлыг телевизийн овсгоотой зураглаач дурандаа буулгасан нь дуу, дүрстэйгээ бий.

Тэгээд болоогүй багш нь шавьдаа даваа наймаалцах ажлыг үлгэрлэн сурамгай гэгч нь зохион байгуулж буйг дэргэдээс нь харсан холбооны удирдлагууд хариуцлага тооцолгүй өнгөрсөн билээ. Энэ мэт бусармаг зүйлсийг тэр даруйд нь зогсоогоогүйн балгаар даваа наймаалцах асуудал аймаг, сумын наадмын хэмжээнд хүрсэн гэвэл үнэнээс хол зөрөхгүй болов уу. Хэдхэн хоногийн өмнө болсон Бүх цэргийн наадамд бөхчүүд даваа наймаалцсан асуудал мэр сэр гаргаж, бөх сонирхогчид таагүй хүлээж авсан.

Гэхдээ сайн талыг нь харвал бөх эхлэхээс өмнө даваа наймаалцвал спорт хороогоор нь хасахыг анхааруулсан нь нэн сайшаалтай.

Даваа наймаалцахыг завдсан уу, ямартаа ч хоёр сумын цолтой бөхөд сануулга өгч харагдав. Гэхдээ ингэж сануулж, хасахыг цагаан дээр бичих ёстой санагдав. Тиймээс бөхчүүд, бөхийн зүтгэлтнүүд минь даваа наймаалцах асуудлыг таслан зогсоохын төлөө нэг санаа бодолтой байж, удахгүй болох “Их Эе”-ийн хуралдаа идэвхитэй оролцож, энэ асуудлаа нэг тийш болгоорой.

Б.Жаргал