Шүүгч асан Л.Бямбаагийн үхэлд буруутгаад буй Шүүхийн шийдвэр гүйцэтгэх Ерөнхий газрын /ШШГЕГ/ ажилтнуудад холбогдох шүүх хурал Баянгол дүүргийн Эрүүгийн хэргийн анхан шатны шүүхэд өнөөдөр 09.00 цагт эхэлнэ. 

Г.Сүхболд нарын дөрвөн хүнийг хууль сахиулагч яаралтай тусламж үйлчилгээ үзүүлэх үүргээ биелүүлээгүй хайнга хандсан гэх үндэслэлээр буруутган шүүх юм. АТГ-аас Салхитын мөнгөний ордын эзэмшигчидтэй холбоотой хэргээр 2019 оны хоёрдугаар сарын 20-ны өдөр хойшлуулшгүй ажиллагаа явуулж, нэр бүхий таван иргэнийг саатуулан баривчилсан.

Тэдний дунд гавьяат хуульч Л.Бямбаа агсан байсан. Улмаар шүүгч асан Л.Бямбааг эрүүгийн хоёр ч хэрэгт холбогдуулан, яллагдагчаар татаж Цагдан хорих 461 дүгээр ангид саатуулсан юм. Харин түүнийг саатуулсан 48 цагийн хугацаа дуусч, хорих ангиас гаргахаар очиход тэрбээр харамсалтайгаар амиа алдсан байсан юм. Уг хэрэгтэй холбогдуулан тухайн үед ээлжинд гарч байсан ШШГЕГ –ын ажилтан Г.Сүхболд нарын дөрвөн хүнд эрүүгийн хэрэг үүсгэн шалгасан билээ.