Соёлын яамнаас НЗДТГ-тай хамтран хэрэгжүүлж буй "Соёлын цаг" аян наймдугаар сарын 26-ны өдрөөс эхлэн нийслэлийн 9 дүүрэгт “Танай дүүрэгт таны дэргэд” уриатайгаар хэрэгжиж байна. 

Тус аяны хүрээнд мэргэжлийн урлагийн байгууллагууд нийслэлийн 9 дүүргийн 24 байрлалд байрлах талбайдад урлагийн тоглолтуудаа толилуулж байгаагийн зэрэгцээ энэ сарын 15-ны өдрөөс эхлэн тусгай хуваарь гарган зорилтот бүлгийн байгууллагуудад тоглолтуудаа зохион байгуулж эхэллээ.

Зорилтот бүлэгт ахмадын сувилалууд, асрамжийн төвүүд, халамжийн төвүүд, хорих ангиудыг хамруулж байгаа бөгөөд өчигдөр буюу 15-ны өдөр Үндэсний Урлагийн Их театр ШШГЕГ-ын харъяа 409 дүгээр хорих ангид, Нийслэлийн Улаанбаатар чуулга Батсүмбэрийн Ахмад настны асрамжийн үндэсний төвд тус тус урлагийн тоглолтуудаа зохион байгуулж нийт 400 гаруй хүмүүжигчид болон ахмадуудад дуу хуураа өргөн барьж цар тахлаас урьдчилан сэргийлэх уриалгыг хүргүүллээ.

Цаашид урлагийн байгууллагууд маань нийслэлийн 9 дүүрэгт байрлах зорилтод бүлгийн байгууллагуудад тусгай хуваарийн дагуу урлагийн тоглолтуудаа зохион байгуулна.