Зорчих эрхийг хязгаарлах ялыг 2021 оны нэгдүгээр сараас хэрэгжүүлж эхэлнэ. Энэхүү хуулиар анх удаа хөнгөн гэмт хэрэг үйлдсэн. Санамсар болгоомжгүйгээсээ бусдад хөнгөн, хүндэвтэр гэмтэл учруулсан, зам тээврийн осол гаргасан болон гэр бүлийн хүчирхийлэл үйлдсэн этгээдэд дээрх ялыг онооно гэлээ.

Эдгээрээс анхаарал татаж байгаа нь гэр бүлийн хүчирхийлэл үйлдэгчид дээрх ялыг оноох гэнэ.

Нөгөө нэмэгдэхүүнийг байрыг сольсон ч нийлбэрийн дүн өөрчлөгдөхгүй гэдэгтэй адил зүйл. Гэртээ согтуугаар агсам тавиад байна. Гэр бүлийнхнийгээ зодож, дарамтлан танхайраад  байна гэх дуудлага цагдаагийн байгууллагад нэлээдгүй ирдэг.

Тэгвэл ийм этгээдийн эрхийг нь хязгаарлаж, цахим гавтай гэрт нь байлгаснаар хүчирхийллийг таслан зогсоож чадаж байна гэж ойлгох уу. Эргэлзээтэй асуудал юм. Нийслэл хотын хэмжээнд хоногт 1200-1500 хэрэг бүртгэдэг. Үүний 100-150 орчим нь гэр бүлийн хүчирхийллийн шинжтэй дуудлага, мэдээлэл байдаг байна.

Одоо бол энэ төрлийн хэрэгт 7-30 хоногийн хугацаанд баривчлах шийтгэл оногдуулж, зан үйлд нөлөөлөх 10-50 цагийн албадан сургалтад хамруулдаг.

Удаа дараа шийтгэл хүлээсэн ч засрахгүйгээр байнгын хүчирхийлэл үйлддэг этгээдэд зургаан сараас хоёр жил хүртэл хорих  ял оногдуулахаар хуульчилсан байдаг. Харин шинэ хуулиар хүчирхийлэгч гэртээ гэр бүлийнхнийгээ хэл амаар доромжлон, дарамталсан шигээ ялаа эдэлж суух болох  нь.

У.Гэрэл