Төр захиргааны байгууллагаас гаргасан тушаал, шийдвэрийг албажуулж дардаг төрийн тамга төрсөн өдрийн мэндчилгээнд дарагдах хүртлээ үнэгүйджээ. Шинэхэн сайд салбараа тэргүүлээд бүтэн улирал ч хүрээгүй. Гэвч хийсэн нэг үйлдлээрээ итгэл үзүүлсэн "дарга"-ынхаа нэрийг шороотой хутгаж орхих нь тэр.

Мэдээж хүлээх үүрэг, хариуцлага, эрх ямбыг нь зааж өгөөгүй "дарга"-ынх нь буруу байлгүй яахав.

Уг нь салбартаа олон жил манлайлж ажилласан ажилтандаа сайдын зүгээс тусгайлан мэндчилгээ дэвшүүлэх гэсэн санаа байжээ. Тамга дардаг нь л илүүц болохоос. 

Хөдөлмөр нийгмийн хамгааллын сайдын эрхлэх асуудалд хүн амын хөгжлийн бодлого, төлөвлөлтийн асуудал, нийгмийн халамжийн бодлого, нийгмийн даатгалын бодлого зэрэг 10 гаруй асуудал бий.

Хийх ажил их. Хэлэх амархан ч хийх хэцүү.

Дээр нь дэлхий нийтэд цар тахал дэлгэрсэн энэ үед хаа хаанаа эдийн засаг тун яггүй байдалд байна. Нийт иргэдээ хэрхэн цалинтай, орлоготой байлгах, нөхцөл байдал хүндэрвэл орлогыг нь яаж хамгаалах гээд бодлого боловсруулах. Боловсруулсан бодлогоо хэрэгжүүлж, үр дүнд хүргэх цаг шүү дээ.

Тиймээс төрийн тамга төрсөн өдрийн тамга болох хүртэл үнэгүйдүүлсэн энэ асуудлыг "дарга" нь анхаарч үзээсэй. Шинэхэн сайдууддаа эрхлэх үүргийг нь тодорхой зааж өгөхийг сануулъя. Ажил үүргээ амьдрал ахуйтайгаа холбосон салбарын сайдад дайж хэлэхэд техник технологи хөгжсөн өнөө үед төрсөн өдрийн мэндийг яаж л бол яаж хүргэж болно шүү. 

Б.Лхам