Хичээл, сургуулиудын үйл ажиллагааг хэвийн горимд шилжүүлж, хоёр настнуудыг цэцэрлэгт хамруулах Засгийн газрын шийдвэр гараад байгаа билээ.

Тэгвэл есдүгээр сарын 18-ны баасан гарагийн 09.00 цагаас эхлэн 21-ний даваа гарагийн 12.00 цаг хүртэл цахим бүртгэлийг www.tsetserleg.ulaanbaatar.mn хаягаар явуулах юм.

Дээрх хугацаанд бүртгэл 24 цагаар үргэлжлэх аж. Бүртгэл хаагдсаны дараа буюу есдүгээр сарын 21-нд элсэлтийг нэг зэрэг санамсаргүй түүврийн аргаар явуулах юм. Ингэхдээ 2018 оны нэгдүгээр сарын 1-нээс арванхоёрдугаар сарын 31-н хүртэл төрсөн хүүхдийг бүртгэх бөгөөд өөр онд төрсөн хүүхдийн регистрийг оруулвал систем хүлээж авахгүй аж.

Иргэд хүүхдээ бүртгүүлэхдээ: 

-www.tsetserleg.ulaanbaatar.mn цахим элсэлтийн хуудсаар нэвтрэх юм. 

-Цэцэрлэгт бүртгүүлэх хүүхдийнхээ регистрийн дугаарыг оруулж, хүүхдийн мэдээлэл үнэн байгаа эсэхийг шалгана.

-Тухайн цэцэрлэгт хичнээн хүүхэд бүртгүүлсэн талаар тоон мэдээлэл гарч ирнэ.

-Утасны дугаар оруулах цонх гарч ирэхэд таны дугаарт баталгаажуулах код ирнэ.

-Утсанд ирсэн баталгаажуулах кодыг бүртгэлийн цонхонд бичсэнээр системд таны хүүхдийн бүртгэл баталгаажна. 

Мөн 18-22-ны өдрүүдэд цэцэрлэг бүр дээр иргэдэд туслах бүртгэлийн ажилтнууд ажиллана. Онлайнаар бүртгүүлэх боломжгүй иргэд хүүхдийнхээ бичиг баримтыг авч очин, бүртгэлийн ажилтнуудын тусламжтайгаар бүртгүүлэх боломжтой. Дээрх өдрүүдэд 7577-8080 лавлах утас ажиллах юм байна.