Ирэх даваа гарагаас бүх шатны сургууль цэцэрлэгийн үйл ажиллагаа хэвийн горимд шилжиж, үргэлжлэхээр болсон билээ. Тэгвэл хичээл сургалт хэрхэн явагдах талаар БШУЯ-ны мэргэжилтэн Т.Ням-Очир мэдээлэл өгөв.

Тэрбээр "Бүх шатны хичээл сургуулийг хэвийн горимд шилжүүлэх болсонтой холбоотойгоор теле хичээлийг түр зогсоож байгаа. Харин теле хичээлийг эцэг, эх, багш, сурагчид авч ашиглаж болохуйцаар буюу цахим орчин веб сайтдаа байршуулна. Харин тухайн сургууль баталсан хуваарийн дагуу хичээлээ заах бөгөөд 10 дугаар сарын нэгэн хүртэл бататгах хичээл орно" гэв. Түүнчлэн өнгөрсөн жил зайны сургалт удаан хугацаанд орсон учир ямар нэгэн уралдаан тэмцээн, олимподыг сургууль, орон нутгийн түвшинд зохион байгуулахгүй байх зөвлөмж өгөөд байгаа аж. Энэ нь хичээл сургалтыг хурдан хугацаанд хэвийн горимд шилжүүлэх холбоотой гэж үзэж байгаа юм байна. Түүнчлэн сургууль цэцэрлэгүүд ашиглаж болох бүх орц гарцаа ашиглаж, аль болох бөөгнөрөл үүсгэхгүй, ариутгал халдваргүйжүүлэлтийн дэглэмээ барьж ажиллахыг үүрэг болгосон гэдгийг онцолсон.