Сүүлийн өдрүүдэд энэ сарын сүүлчээр ирэх вакциныг коронавирусийн туршилтын вакцин байх магадлалтай хэмээх хардлага олон нийтийн дунд гараад байгаа билээ.
Тэгвэл эл асуудлаар ХӨСҮТ-ийн захирал Д.Нямхүү мэдээлэл өглөө. Тэрбээр "Есдүгээр сарын сүүлээр ирэх вакциныг коронавирусийн туршилтын вакцин гэж ташаа ойлгож байна. Дэлхий дээр ковидын вакциныг дэлхийн тэргүүлэх улс орнууд хийж байгааг чих тавин чагнаж байна. Томуугийн вакцин энэ сард багтаж ирнэ. Засгийн газраас захиалсан 120 мянган тун вакцин, АНУ-ын ХӨСҮТ-ээс бидэнд хандив болгон өгч байгаа 89 мянга 450 тун, ДЭМБ-ын дэмжлэгээр 300 мянган тун вакцин ирнэ.
Харин томуугийн вакциныг ирэх үед зорилтот бүлэг буюу хамгийн түрүүнд хийх шаардлагатай бүлгүүдэд хурдан хийх ажлыг цаг алдалгүй зохион байгуулна. Үүнд эмч, эмнэлэг, хууль хүчний, хил гаалийн ажилчид ордог. Эдгээр хүмүүс нь иргэдтэй хамгийнтулж харьцдаг, онцлогтой тул сонгож авч байгаа юм. Мөн бидний хамгийн гол зорилтот бүлэг бол 5 хүртэлх насны хүүхдүүд, 65-аас дээш насны өндөр настнууд болон жирэмсэн эмэгтэйчүүд юм” гэв.
