Иргэн Ж.Энхбат Улаанбаатар хотын Ерөнхий менежер Т.Гантөмөр, НИТХ-ын дарга Р.Давга гарыг шалгуулахаар АТГ-д хандаж буй талаараа мэдээлэл хийлээ. Тэрбээр НИТХ-ын дарга Р.Давгыг "Гэмт хэргээс урьдчилан сэргийлэх зардлын мөнгөөр төлөөлөгч нарыг гадаадад томилолтоор явуулж, сургалтын үйл ажиллагаанд зарцуулсан" гэх үндэслэлээр АТГ-т шалгуулахаар хандаж байгаа аж. Түүнчлэн НИТХ-ын дарга Р.Давга 2019 оны арванхоёрдугаар сарын 24-ний өдрийн 208 дугаар тогтоолоор 110 сая төгрөг завшсан байж болзошгүй гэх үндэслэлээр шалгуулж байгаа юм байна. 

Мөн Улаанбаатар хотын Ерөнхий менежер Т.Гантөмөрт гомдол гаргаж байгаа юм байна. Тодруулбал, Улаанбаатар хотын захирагчийн ажлын албанаас нийслэлийн ногоон байгууламжийн ажлыг гүйцэтгүүлэхээр нэр бүхий хуулийн этгээдүүдэд 403 сая төгрөгийн санхүүжилт олгосон. Ингэхдээ зөвшөөрөлгүй аж ахуй нэгжийг сонгосон гэх үндэслэлээр гомдол гаргаж байгаа юм байна.   

Тэрбээр “Улаанбаатар хотын Захирагчийн ажлын алба, тус байгууллагын дарга Улаанбаатар хотын Ерөнхий менежер Т.Гантөмөрийн хууль зөрчсөн үйл ажиллагаанд холбогдуулж дор дурдсан гомдлыг гаргасан байна. Үүнд:

1 .Улаанбаатар хотын Захирагчийн ажлын албанаас Улаанбаатар хотын тохижилт, ногоон байгууламж, замын ажил гүйцэтгүүлэхээр нэр бүхий хуулийн этгээдэд 2018 онд 400.3 сая төгрөгийн санхүүжилтийг олгосон байх бөгөөд ингэхдээ эрх мэдэл, албан тушаалын байдлаа урвуулан ашиглаж, холбогдох хуулиудыг зөрчсөн болно.

Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 7 дугаар зүйлд Худалдан авах ажиллагааны журмын талаар заасан бөгөөд 7.1-т “Захиалагч бараа, ажил, үйлчилгээ худалдан авахдаа дор дурдсан тендер шалгаруулалтын журмыг баримтлан гүйцэтгэгчийг сонгож гэрээ байгуулна”, 7.1.1-т “нээлттэй тендер шалгаруулалтын журам”, 7.1.2 “тендер шалгаруулалтын онцгой журам”-ын дагуу гүйцэтгэгчийг сонгож гэрээ байгуулахаар заасан.

Мөн хуулийн 21 дүгээр зүйлд “Тендерийн урилгыг нийтэд зарлан мэдээлэх” тухай заасан бөгөөд 21.1-т “Захиалагч тендерийн урилгыг үндэсний хэмжээний өдөр тутмын сонин, худалдан авах ажиллагааны цахим систем болон хэвлэл мэдээллийн бусад хэрэгслээр нийтэд зарлан мэдээлнэ.”, 46.1-т “Захиалагч бараа, ажил, үйлчилгээг худалдан авах талаар дараахь эрх, үүрэгтэй байна.”, 46.1.1-д “энэ хуульд заасны дагуу үнэлгээний хороо байгуулах”, 46.1.2-д “үнэлгээний хорооны үйл ажиллагаа, үнэлгээний дүгнэлт холбогдох хууль тогтоомжид нийцсэн эсэхэд хяналт тавьж, гарсан зөрчлийг арилгуулах”, 46.1.3-д “үнэлгээний хорооноос гаргасан дүгнэлтэд үндэслэн гэрээ байгуулах эрх олгох шийдвэр гаргах”, 46.1.4-д “худалдан авах бараа, ажил, үйлчилгээг батлагдсан төсөвт багтаан үр ашигтай төлөвлөж, зохион байгуулах”, 46.1.5-д “энэ хуулийн 7.6-д зааснаас бусад бараа, ажил, үйлчилгээг санхүүжүүлэх хөрөнгийн эх үүсвэр батлагдсаны дараа худалдан авах ажиллагааг эхлүүлэх” гэж заасан.

Гэтэл бодит байдал дээр Улаанбаатар хотын Захирагчийн ажлын алба нь гүйцэтгэгч компаниар ажил гүйцэтгүүлэхдээ сонгон шалгаруулалтыг хуулийн дагуу явуулаагүй, гүйцэтгэгч компанийг сонгон шалгаруулахад тавигдах шаардлагыг хангаагүй, тусгай зөвшөөрөлгүй компанид улсын төсвийн мөнгийг шилжүүлж ажил гүйиэтгүүлсэн нь дээрх хуулийн заалтыг зөрчсөн, авлига, хувийн ашиг сонирхол харж, албан тушаалын байдлаа урвуулан ашигласан Эрүүгийн хуульд заасан гэмт хэргийн шинжтэй үйлдэл гэж харж байна. Тусгай зөвшөөрөлгүй хуулийн этгээд гэдэг бол тухайн төрлийн ажлыг гүйцэтгэж байсан туршлага, чадваргүй гэсэн үг бөгөөд тухайн ажлыг чанаргүй гүйцэтгэх нь тодорхой, Хотын Ерөнхий менежер Т.Гантөмөр нь ашиг хонжоо хайж улсад 400 сая төгрөгийн хохирол учруулсан гэж үзэх бүрэн үндэстэй” хэмээжээ.