Хойд эцгийнхээ гарт амиа алдсан есөн настай охины асуудлаар УИХ дахь эмэгтэй гишүүд цагдаагийн байгууллагын төлөөлөлтэй уулзаж холбогдох мэдээллийг тодрууллаа.

Энэ үеэр УИХ-ын гишүүн, БОАЖ-ын сайд Д.Сарангэрэл “Талийгаач охин хойд эцэгтээ удаа дараа зодуулж, эмнэлгийн үйлчилгээ авч байжээ. Энэ тухай ч хөршүүд нь мэддэг байж. Хэрэв өмнөх тохиолдлуудад нь арга хэмжээ авч байсан бол энэ охин одоо амьд ч байх байсан юм уу. Тиймээс эрх зүйн орчин, цагдаагийн байгууллагын хүчин чадлыг нэмэгдүүлэх зэргээс өмнө бүртгэлийн ажлыг сайн зохион байгуулдаг баймаар байна” гэдгийг онцоллоо.

Шүүх эмнэлгийн дарга Г.Дагиймаагийн өгсөн мэдээллээр охины гадна талд дух, зүүн хацар хуучин зулгаралтуудтай. Хоёр талын хавирга ихэнх нь хугарсан. Өмнө нь мөн хугарч байсан бороолттой байна. Бүдүүн гэдэсний чацархай урагдсан. Урьдчилсан байдлаар гадаргуутай зүйлээр цохисон байх гэж таамаглаж байна гэсэн юм.

Харин цагдаагийн байгууллагаас өгсөн мэдээллээр тухайн үед хойд эцэг болох иргэн Б согтууруулах ундааны зүйл хэрэглэсэн байсан. Одоогоор цагдан хоригдсон байгаа. мөрдөн байцаалтын шатанд тодорхой мэдээлэл өгөх боломжгүй гэлээ.

А.Сүх