Ерөнхий боловсролын сургуулиуд болон цэцэрлэгүүд есдүгээр сарын 21-нээс хэвийн горимоор хичээллэж эхэлсэн. Үүнтэй холбоотойгоор тухайн сургууль, цэцэрлэгийн удирдлагууд нэг ангид хэчнээн хүүхэд авах, хэдэн анги, танхим, бүлэгтэй байх зохицуулалтыг дотооддоо хийх юм.

Цаашлаад зарим сургууль сурагчдаа гурван ээлжээр хичээллүүлж байна гэх эцэг, эхийн гомдол байгаа юм. Энэ талаар БШУЯ-ны Бага, дунд боловсролын газрын дарга Т.Ням-Осор “Энгийн горимд шилжих үед хугацаандаа ашиглалтад ороогүйгээс гурван ээлжээр хичээллэж болзошгүй арваад сургууль байсан.

Үүнийг түрээсийн байр ашиглуулах болон анги хуваах зохицуулалтаар шийдвэрлэсэн” гэлээ. Мөн энэ жилийн хувьд сурах бичгийн хүрэлцээ ямар байгааг түүнээс тодруулахад “Сурах бичгийг зах зээлд борлуулахгүй. Тухайн сургуулийн хүүхдийн статистик тоон мэдээллийг авч, сурах бичгийг наймдугаар сарын 15-нд бүх сургуульд хүргүүлсэн.

Мөн бататгал хичээл орж байгаа учраас өмнөх ангийн сурах бичгээ зарим сургуулиад хурааж аваагүй. Харин аравдугаар сарын 1-нд бататгал хичээл дуусах учраас хуучин сурах бичгийг  хурааж авна” гэлээ. Цаашлаад хүүхдийн элсэлтээс шалтгаалж, сурах бичиг ихэдсэн эсвэл дутсан тохиолдолд сургууль хооронд шилжүүлэх боломжтой юм байна.