"Насан туршдаа суралцахуй-хүүхдийн ирээдүй" ном тун удахгүй уншигчдын хүртээл болох нь. "Метро девелопмент" группийн захирал Б.Одсүрэн “Өнөөгийн боловсролын тогтолцоонд чадвар хандлага ерөөсөө яригдахгүй байна” хэмээн шүүмжлэлтэй ханддаг.

Тэрбээр хэвлэлд өгсөн ярилцлагадаа “Технологи маш хурдтай өөрчлөгдөж байгаа энэ нөхцөлд боловсрол гэж юу вэ гэдгийг ойлгох нь чухал. Нөгөө талаас хүүхдүүддээ ямар боловсрол, мэдлэг эзэмшүүлэх вэ гэдэгт санаа зовдог учраас юм уншиж судалдаг. Ингэж судалсаар байгаад ном бичих хэмжээний материал цуглуулчихсан. Хүн боловсрол эзэмшинэ гэдэг нь өөрөө буруу юм. Боловсрол гэдэг бол үйл явц, процесс юм. Генри Форд “Хүн 20 насандаа ч хөгширч болно. 80 насандаа ч хөгширч болно” гэсэн байдаг. Хүн сурахаа зогсоовол хөгширнө гэсэн үг л дээ. Тэгэхээр боловсролыг бид процесс гэж ойлгох хэрэгтэй. Өөрийгөө байнга шинэчилж, өөрчлөх ёстой” хэмээн ярьсан байдаг.

Тиймээс ч ирээдүй өнөөдрийнхөөс хэрхэн өөрчлөгдөх талаар, ямар ажил мэргэжил эзэмшвэл зохистой, технологийн эрин зуунд ажлын байр, хүний ур чадвар ямар байх ёстой талаар "Насан туршдаа суралцахуй-хүүхдийн ирээдүй" номондоо бичжээ.

Номын зохиолч Б.Одсүрэн "Насан туршдаа суралцахуй-хүүхдийн ирээдүй" номынхоо талаар “Ирээдүй шинэ технологийн дэвшил, инновацийн нээлтээр дүүрэн байх нь гарцаагүй. Таахын аргагүй тэрхүү өөрчлөлт бидний төсөөлж буйгаас ч хурдтай өрнөх нь. Ердөө 10-хан жилийн дараа л гэхэд ажлын байр, амьдралын хэв маяг танигдахын аргагүй болж өөрчлөгдөнө. Эцэг эх та энэхүү өөрчлөлтөд хүүхдээ бэлдэж чадаж байна уу? Судалгааны эмхэтгэл болсон энэхүү номонд ирээдүй өнөөдрийнхөөс хэрхэн өөрчлөгдөх талаар, ямар ажил мэргэжил эзэмшвэл зохистой, технологийн эрин зуунд ажлын байр, хүний ур чадвар ямар байх ёстой талаар өгүүлнэ” хэмээжээ.