Засгийн газрын өнөөдрийн ээлжит хуралдааны үеэр Ерөнхий сайд У.Хүрэлсүх хойд эцэгтээ зодуулж амиа алдсан байж болзошгүй есөн настай охины хэргийг анхааралдаа авахыг салбарын сайд, холбогдох албаныханд  үүрэгджээ.

Мөн хэргийг үйлдэхэд хүргэсэн нөхцөл байдлыг шалгаж, судлах ажлын хэсгийг ЦЕГ-аас байгуулжээ. Харин энэ асуудлаар ХЗДХ-ийн сайд Х.Нямбаатар "Шүүх шинжилгээний үндэсний хүрээлэнгээс гаргасан урьдчилсан дүгнэлтэд, охин удаан хугацаанд хүчирхийллийн золиос болж байсан гэж гаргасан. Энэ асуудалтай холбоотойгоор хэд хэдэн байгууллагынхан хариуцлага хүлээх ёстой. Тухайлбал, хорооны хэсгийн болон олон нийтийн байцаагч, олон нийтийн цагдаа, Гэмт хэргээс урьдчилан сэргийлэх ажлыг зохицуулах зөвлөл мөн хамтарсан багууд хэрхэн хяналт тавьж байв гэдгийг эхлээд шалгаж тогтооно. Хэсгийн байцаагчдын хувьд ачаалал өндөртэй байдаг. Хэсгийн нэг байцаагч 40-50 зөрчлийн хэрэг шалгахад зэрэг ажлын ачаалалтай. Үүнийг цаашид уялдуулах шаардлага бий. Мөн  Гэмт хэргээс урьдчилан сэргийлэх ажлыг зохицуулах зөвлөлийн мөнгөн хөрөнгийг аймаг, нийслэлд дарга нь төвлөрүүлж, зарцуулах нь зөв, буруу эсэхийг одоо шийдэх ёстой. Энэ мөнгөөр гадаад руу томилолтод явдаг, автомашин худалдаж авдаг зэргийг эргэж харах цаг нь болсон.

Торгуулийн орлогыг төвлөрүүлж, дахин зарцуулдаг сан бий. Энэ мөнгөний зарцуулалтыг сургуулийн нийгмийн ажилтан, хэсгийн байцаагч, олон нийтийн цагдаа гэсэн энэ хүмүүсийн ажлын үйл ажиллагаанд болон орон тоог нь нэмэгдүүлэх чиглэлд зарцуулах хуулийн өөрчлөлтийг хийхээр ярьж байна. Хоёрдугаарт, гэр бүлийн хүчирхийлэл үйлдэгсдийг шийтгэхдээ хохирогч, хүчирхийлэгч хоёрыг уулзуулахгүй байх зохицуулалтыг авч хэрэгжүүлэх шаардлага байна" хэмээлээ.