“Ковид-19”-цар тахал гарснаар жижиг, дунд үйлдвэрлэл эрхлэгчид хүнд байдалд орж, арилжааны банкинд тавьсан өр зээлээ төлж чадахгүйд хүрсэн. Үүнд, барилгын салбар болоод аялал жуулчлал, нийтийн хоол, зочид буудал зэрэг ахуй үйлчилгээний салбарууд, соёл урлагийн байгууллагууд хамгийн ихээр өртсөн. Үүнийг дагаад ажлын байргүй үлдсэн иргэн олон.

Тухайлбал, энэ оны эхний найман сарын байдлаар 16 мянган хүн ажилгүй болж, 33 тэрбум төгрөгийн ажилгүйдлийн тэтгэмж авсан гэсэн судалгаа гарчээ. Харин Засгийн газар, УИХ-аас цар тахлын үед ажлын байрыг хадгалж үлдэх, хөдөлмөр эрхлэлтийг бууруулахгүй байх чиглэлээр дорвитой арга хэмжээ авсны дүнд байдал дээрдсэн байна.

Үндэсний статистикийн хорооны үзүүлэлтээр, нийгмийн даатгалын шимтгэл төлж байгаа аж ахуйн нэгж, байгууллагын тоо тодорхой хэмжээгээр нэмэгдэж, даатгуулагчийн тоо буураагүй байна.