“Хүүхдүүдээ аваръя” уриатай жагсаал Сүхбаатарын талбайд боллоо. Жагсагчид хүүхэд хамгааллын төсөв, энэ чиглэлийн байцаагч нарын тоог нэмэгдүүлэхийг шаардсан юм.

“Хүүхдийн индэр” ТББ-ын тэргүүн Ц.Баттуяа “Хүүхдийн амьд явах эрх алдагдаж байна. Өнөөдөр Монгол Улсад хүүхэд хамгаалалтгүй байна. Үүнд төр засгийг буруутгаж байна.

Сая харамсалтайгаар амиа алдсан есөн настай охины хэргээс гадна хэдхэн сарын өмнө Хэнтий аймагт бяцхан охин хойд эцэгтээ тамлуулж амиа алдсан хэргийг мартаагүй.

Ил гараагүй л болохоос биш бидний мэдэхгүй хэрэг байна.

Энэ жил хүүхдийн хүчихийлэл өмнөхөөс хоёр, гурав дахин өссөн үзүүлэлттэй байна. Бид хаана, юуг буруу хийв гэдгийг эргээд харах ёстой болж байна.

Хууль эрх зүйн орчны хувьд хангалттай байна. Гол хэрэгжилтүүд нь сул байна.

Хамтарсан багийг хүртээмжтэй ажиллуулах талаар аймаг, нийслэлийн ИТХ-д хангалттай төсөв батлагдаагүй. Гэтэл гурван тэрбум төгрөгөөр усан оргилуур барьчихсан. Мөн 200 сая төгрөгөөр гадаадад аялах төсөв баталсан байна.

Хуульд зааснаар 5000 хүн тутамд нэг нийгмийн ажилтан ажиллах ёстой. Гэвч Баянзүрх дүүргийн VI хороо гэхэд 26 мянган хүн амтай. Энд ганцхан нийгмийн ажилтан ажиллаж байна. Олон хүн амтай дүүргийн нийгмийн ажилтан зорилтот бүлэгтээ хүрч ажиллахад наад зах нь унааны зардлаас эхлээд төсөв мөнгө юу ч байдаггүй. Орон нутгийн төсвөө хангалттай тавиад өгчихвөл хүүхдүүдээ эрсдэлээс хамгаалах боломжтой гэж бид үзэж байна” гэлээ.

А.Сүх