УИХ дахь эмэгтэй гишүүд Архидан согтуурахтай тэмцэх тухай хуульд нэмэлт, өөрчлөлт оруулах хуулийн төсөл боловсруулан хэлэлцэж буй. Тэгвэл ХЗДХ-ийн сайд Х.Нямбаатар уг хуульд нэмэлт, өөрчлөлт оруулах биш шинэчлэн найруулах ёстой гэж үзэн шинэчилсэн найруулгын төсөл боловсруулжээ.  

Эрүүлжүүлэгдэж байгаа хүмүүсийн 80 гаруй хувь нь тодорхой эрхэлсэн ажил, мэргэжилгүй байна гэсэн судалгаа гарсан бөгөөд аливаа төрлийн гэмт хэрэг архидан согтууралттай холбогдон гарч байгааг гишүүд онцолж архины хэрэглээг хянах, хуулийн зохицуулалт бий болгох ёстой гэж үзсэн.

Тиймээс архины градусыг бууруулах, онцгой албан татвар тогтоох, аж ахуйн нэгжүүдийн тоог цөөлөх санал гаргасан юм. Тодруулбал, архи, согтууруулах ундаагаар үйлчлэх цэгийг нийслэлд 5000 хүн ам тутамд нэг, орон нутагт 3000 хүн ам тутамд нэг байхаар тооцон хуулийн төсөлд оруулаад байна.

Мөн согтууруулах ундаа үйлдвэрлэдэг, импортолдог аж ахуйн нэгжүүдийн орлогоос татвар авч, архидан согтууралттай тэмцэх сан байгуулж, донтой хүмүүсийг албадан эмчлэх, эмнэлэг бий болгох талаар ХЗДХ-ийн сайд Х.Нямбаатар онцолсон юм. 

А.Сүх