Ховд аймгийн Алтай суманд тарваган тахлын нэг тохиолдлыг бүртгэж, ойрын хүрээний 19 хүнийг тусгаарлаад байна.

Ховд аймгийн Алтай суманд тарваганы мах идсэн өгүүлэмжтэй 25 настай эмэгтэй халуурч, булчирхай нь томрох шинж тэмдэгтэйгээр сумын эмнэлэгт ханджээ.Тус аймгийн Зоонозын өвчин судлалын төвийнхөн өвчтөнөөс шинжилгээ авснаар тарваган тахал мөн болохыг нь баталжээ. Тахлаар өвчилсан 25 настай эмэгтэй есдүгээр сарын 19-нд нөхрийнхөө агнаж өвчсөн тарваганы махыг чанаж идсэн байна. Эхний ээлжид өвчтөнтэй ойр байсан 19 хүнийг илрүүлж, тусгаарлан эхний сорьцын шинжилгээг авчээ. Харин эмэгтэйн нөхрийн бие одоогоор хэвийн байгаа ба түүнийг Ховд аймгийн нэгдсэн эмнэлэгт хэвтүүлэн эмчилж байгаа юм байна.

Тарваган тахал өвчин дэгдсэнтэй холбогдуулан Алтай сум руу орох, гарах хөдөлгөөнийг хязгаарлажээ. Хамгийн гол нь орон нутагт тарваган тахлын шинжилгээг авдаг болсон тул цаг хугацаа алдахгүй сайн талтай юм байна.