ОБЕГ-ын харьяа Үндэсний аврах бригадын Уул уурхайн аврах ангийн алба хаагчид 2017 онд амиа алдсан 19 настай иргэний цогцсыг Налайх дүүргийн эзэнгүй орхигдсон уурхайн гүнээс гаргаж, Шүүхийн шинжилгээний үндэсний хүрээлэнд шилжүүлжээ.

Тодруулбал, 2017 онд нийслэлийн Налайх дүүргийн III хорооны нутаг дэвсгэрт байрлах эзэнгүй орхигдсон уурхайд тус дүүргийн иргэн 19 настай, эрэгтэйн амь насыг хөнөөж, цогцсыг булж орхисон нь мөрдөн байцаалтын явцад тогтоосон бөгөөд цогцсыг уурхайн гүнээс гаргаж өгөх хүсэлтийг Цагдаагийн байгууллагаас тавьсан юм.

Хүсэлтийн дагуу, Үндэсний аврах бригадын Уул уурхайн аврах ангийн алба хаагчид хоёр метр куб шороог зайлуулж, 80 градусын налуутай, 71 метрийн гүнтэй малталт хийж, цогцсыг гаргаж, Шүүхийн шинжилгээний үндэсний хүрээлэн, нийслэлийн Цагдаагийн газар, дүүргийн Прокурорын байгууллагын хамтарсан ажлын хэсгийн бүрэлдэхүүнд шилжүүлэн өгчээ.