Захиргааны хэргийн давж заалдах шатны шүүх өнөөдөр “Эвийн хүч эх нутгийн төлөө” НҮТББ болон “Босоо хөх монгол” НҮТББ-ын нэхэмжлэлтэй Ашигт малтмал, газрын тосны газар, тус газрын Кадастрын хэлтэст холбогдох хэргийг хянан хэлэлцлээ.

Ашигт малтмал, газрын тосны газар, тус газрын Кадастрын хэлтэст холбогдох, Нийслэл дэх Захиргааны хэргийн анхан шатны шүүхийн шүүгчийн 2020 оны 09 дүгээр сарын 02-ны өдрийн “Хүсэлтийг хэрэгсэхгүй болгож, шүүх хуралдааныг хойшлуулах тухай” 6536 дугаар захирамжид нэхэмжлэгчийн итгэмжлэгдсэн төлөөлөгчийн гаргасан гомдлыг хэлэлцээд уг захирамжийн 2 дахь заалт буюу ...“Мон Атом” ХХК-ийг гуравдагч этгээдээр оролцуулах хүсэлтийг хэрэгсэхгүй болгосон шүүгчийн захирамжийг хүчингүй болгуулах хүсэлтийг хэрэгсэхгүй болгож, “Мон Атом” ХХК-ийг гуравдагч этгээдээр оролцуулах хүсэлтийг хүлээн авахаас татгалзсан... хэсгийг тус шүүх хянах боломжгүй гэж үзлээ.

Тодруулбал, ЗХШХШТХ-ийн 111 дүгээр зүйлийн 111.3-т зааснаар шүүгч өмнө гаргасан захирамжаа илт үндэслэлгүй гэж үзвэл өөрийн санаачилгаар хүчингүй болгох, өөрчлөх боломжтой бөгөөд энэ эрхийнхээ хүрээнд захирамж, тогтоолоо өөрчилж, хүчингүй болгосон тохиолдолд хуулийн 122 дугаар зүйлийн 122.1-д зааснаар гомдол гаргах эрхтэй гэж үзнэ. Харин ЗХШХШТХ-ийн 111 дүгээр зүйлийн 111.3-т заасан эрхээ хэрэгжүүлэхийг хүссэн хэргийн оролцогчдын хүсэлтийг хүлээж аваагүй нь дээрх хуулийн 122 дугаар зүйлийн 122.1-д заасан гомдол гаргах эрхтэй шүүгчийн захирамж, шүүхийн тогтоолд хамаарахгүй тул давж заалдах шатны шүүх гомдлыг хянан хэлэлцэх боломжгүй гэх үндэслэлээр буцааж шийдвэрлэсэн байна.

Эх сурвалж: Захиргааны хэргийн давж заалдах шатны шүүхийн Тамгын газар