Ерөнхийлөгч Х.Баттулга өнгөрсөн хоёрдугаар сард БНХАУ-д айлчлах үедээ коронавирусийн халдвартай тэмцэх ажилд нь дэмжлэг үзүүлж, 30 мянган хонь хандивлах батламжийг БНХАУ-ын дарга Ши Жиньпинд гардуулсан билээ.

Хятадын тал хонийг амьдаар нь авахаар болсон ба эхний ээлжийн 15 мянган хонийг энэ сард хүлээлгэн өгнө хэмээн мэдээлж байсан. Тэгвэл эх сурвалжаас өгсөн мэдээллээр хонийг гаргаад эхэлжээ.

ХХААХҮ-ийн сайдаар ахлуулсан ажлыг хэсэг уг ажлыг зохион байгуулж байгаа бөгөөд вакцинд хамруулсан, халдваргүй, эрүүл хонийг иргэдээс худалдан авах замаар бүрдүүлнэ. Хонийг Дорноговь аймагт худалдан авч, төвлөрүүлнэ хэмээн Шадар сайд Я.Содбаатар онцолж байсан юм.

Улсын хэмжээнд 2020 онд 22.1 сая толгой төл хүлээн авснаар 90 сая гаруй мал бэлчиж байна.

Улмаар бэлчээрийн даац 1.4 дахин буюу 32.9 сая толгой хонин сүргээр хэтэрсэн. Улсын хэмжээнд бэлчээрийн даац хэтэрсэн, ирэх өвөл хатуу өвөл болох цаг агаарын урьдчилсан төлөв гарч байгаа тул энэ онд 25 саяас доошгүй толгой малыг эдийн засгийн эргэлтэд оруулах шаардлагатайг мэргэжлийн байгууллагууд хэлж байсан юм. 

БНХАУ руу хонь гаргахаас гадна ОХУ руу үйлдвэрлэлийн аргаар боловсруулсан 282 тонн мах нийлүүлнэ. Энэ ажилд говийн аймгууд идэвх санаачилгатай оролцохыг Шадар сайд аймгийн Засаг дарга нарт үүрэг болгож байв.

А.Сүх