Монгол Улс жил хүрэхгүйн хугацааны дараа зургаа дахь Ерөхиийлөгчөө сонгоно. Тэгвэл ээлжит орон нутгийн сонгууль ирэх жилийн сонгуулийн өнгийг гаргаад өглөө. Гол өрсөлдөөн хэний дунд явах вэ гэдгийг.

Ерөнхийлөгчийн сонгуульд одоогийн Ерөнхийлөгч Х.Баттулга, Ерөнхий сайд У.Хүрэлсүх нар өрсөлдөх нь бараг тодорхой болоод буй. Бусад намаас гол удирдагчид нь нэр дэвших байх. Харин гол өрсөлдөөн одоогийн төрийн хоёр өндөрлөгийн дунд болно. МАН өнгөрөгч УИХ-ын сонгуулиар ялалтаа бататгаж дахин олонх болсон. Өөрөөр хэлбэл, МАН-д 62 суудал өгсөн нь тус намд хариуцлага үүрүүлж, ялагдсан намаас нь шинэчлэлийг хүссэн хэрэг.

Орон нутгийн ээлжит сонгуулиар МАН хэдий үнэмлэхүй ялалт байгуулсан ч АН мөн чамлахааргүй амжилт үзүүллээ.

Тодруулбал, 21 аймгийн 11 аймаг цэнхэртсэн үзүүлэлт гарчээ. Зарим иргэдийн зүгээс АН-ыг МАХН-тай эвссэний үр дүн гэж үзэж буй ч нөгөө талаар парламентад олонх болсон МАН-д үнэмлэхүй ялалтдаа ханаж болохгүй гэдгийг сануулсан иргэдийг сануулга ч гэж хэлж болохоор.

Түүнчлэн Ерөнхийлөгч Х.Баттулгын рейтингийг ч эндээс харж болно. Тэрбээр санал өгснийхөө дараа иргэдэд хандаж хэлсэн үгэндээ “Өөрчлөлт хийхэд иргэн таны санал чухал байна” хэмээн тодотгон хэлсэн. Магад Ерөнхийлөгчийн хэлсэн энэ үг АН-ыг чамлахааргүй амжилт үзүүлэхэд хүргэсэн бололтой. 

Ерөнхийлөгч бүх ард түмнээс сонгогддог учраас нийтийн эрх ашгийн үүднээс намын гишүүнчлэлээсээ татгалздаг ч уул хүн нь АН-ын угшилтай учраас бусдаас онцгойлох нь илэрхий харагддаг юм. Намаа ядарч явахад нь хаядаггүй гэдгийг ч өнгөрсөн хугацаанд олонтаа харуулсан. Орон нутгийн ээлжит сонгуулиар хэлсэн үгэндээ мөн бататгав.

Ирэх жилийн сонгуулийн өнгийг гаргасан энэ сонгууль МАН-д иргэдээс өгсөн нэгэн төрлийн сануулга боллоо.

Б.Лхам