Сэхээтний нам гэдэг имижээрээ нийгэмд богино хугацаанд танигдсан ХҮН–ынхны дотоодын халаа сэлгээ, хагарал ер дуусдаггүй. Энэ намынх нь нэр хүндийг унагаж, эцэстээ дарга нь хэн бэ гэдэгт иргэд эргэлзэж эхэлсэн. Өнгөрсөн хоёрдугаар сараас хойш Б.Найдалаа, С.Ганбаатар, Т.Ганболд, С.Боргил гэх дөрвөн ч даргын нүүр үзээд амжсан гээд бод доо.

Өнөөдрийг хүртэл хоорондоо тамга, тэмдгээ булаацалдсаар, энэ нь ч нөлөөлж, 2020 оны УИХ, орон нутгийн сонгуульд хэл амтайхан орсон.

Дотоодын тэмцлээсээ болж нэр дэвшигчид нь орон нутгийн сонгуульд өрсөлдөх эрхээ хасуулсан ч эцэст нь сэргээж чадсан юм. Одоогийн албан ёсны дарга гэгдээд байгаа эдийн засагч Б.Найдалаа  орон нутгийн сонгуульд Чингэлтэй дүүрэг 16  дугаар тойрогт нэр дэвшсэн ч тэрбээр өвдөг шороодлоо.

Намын даргын хувьд шаанстай гэж түүнийг олон хүн харж байсан. Харамсалтай нь, чингэлтэйчүүд түүнд итгэл хүлээлгэсэнгүй.

Иргэд, сонгогчдын итгэлийг авч чадаагүй түүнд намынхаа эрх мэдлийг атгуулах нь хэр зохимжтой юм бэ. Ийм хүнд ХҮН-ынхан найдсаар суух уу. Намын дарга  сонгуулиар гишүүдээ ялуулах үүрэг хүлээж, эс бөгөөс хариуцлагаа хүлээж огцордог уламжлалтай.  ХҮН-ынхан ч Б.Найдалаад найдаж суухын оронд хариуцлагыг нь үүрүүлж, намаа шинэчлэх, хагарлыг эвлэрүүлэх нэгнийг даргаараа сонгох нь цаг нь иржээ гэдгийг дээрх үйл явдал харууллаа. 

У.Тэргэл