Энэ долоо хоногт улс төрд болсон онцлох үйл явдал нь 2020 оны орон нутгийн сонгууль байв. Нийслэлийн Иргэдийн төлөөлөгчдийн хурлын 45 мандатын 34-д нь МАН-ын нэр дэвшигчид ялалт байгуулсан бол АН 8, ХҮН 3 суудал аваад байгаа юм. Үүнээс, Баянгол, Сүхбаатар дүүрэгт Ардчилсан нам олонх болсон бол Хан-Уул, Сонгинохайрхан, Чингэлтэй, Баянзүрх, Багануур, Багахангай, Налайх дүүрэгт МАН ялалт байгуулсан. Улс төрийн томоохон хүчнүүд болох АН, МАН-ынхан өчигдөр аймаг, нийслэлийн ИТХ-ын сонгуулийн талаар мэдээлэл хийсэн билээ. Тэдний байр суурийг тоймлон хүргэж байна.   

Ц.Туваан: Хүч тэнцвэргүй, будлиантай сонгууль боллоо 

“АН-ыг дэмжиж, итгэл хүлээлгэсэн ард иргэддээ талархсанаа илэрхийлье. Энэ удаагийн сонгууль төрийн оролцоотой сонгууль боллоо. Найман аймагт АН ялалт байгууллаа. Харин нийслэлд нэлээд хүнд сонгууль болсон. Хууль хүчний байгууллагууд эрх баригч хүчний талд үйлчилж, мөнгө төгрөг хавтгай тараалаа. Мөн нийслэлийн сонгуулийн хорооноос шүүхийн шийдвэрийг урьдчилан мэдэж, хууль бус шийдвэр гаргаж, нэг намын талд үйлчилсэн сонгууль боллоо. Сонгуулийн үеэр хүн амины хэрэг гарлаа. Нэр дэвших эрхгүй хүмүүс өрсөлдсөн хүч тэнцвэргүй, будлиантай сонгууль боллоо. Өөрөөр хэлбэл төрийн оролцоо бага орсон газарт л Ардчилсан нам ялалт байгууллаа. Увс, Архангай, Баянхонгор аймагт нэр дэвших эрхгүй хүн нэр дэвшиж, ялалт байгуулсан зэрэг зөрчилтэй сонгууль боллоо”.

Нийслэлийн МАН-ын хорооны дарга Д.Сумъяабазар "МАН-д хариуцлага хүлээлгэсэн нийт иргэддээ талархсанаа илэрхийлж байна. МАН-ыг ажил хийх нөхцөлөөр бүх шатанд хангаж өгсөнд баярлалаа. Есөн дүүргийн хэмжээнд МАН 200 суудал авлаа. Бүх шатны үйл ажиллагаа яаралтай явагдах ёстой. Амжилт ялалтад баярлаад цаг алдахгүйгээр асуудлаа шийдвэрлэхийн төлөө бид шуурхайлан орлоо. Их хурал, Засгийн газар, орон нутгийн түвшинд хөгжлийн чиг хандлага жигд яригдаж, хэрэгжих ёстой” гэсэн юм. Харин  Хотын даргыг сонгохын тухайд “Тэргүүлэгчид чуулганаа хуралдуулна. МАН-ын бүлгээр хэлэлцэнэ гэх мэт үйл явц өрнөнө. МАН-ын даргын зүгээс тавьж буй суурь шалгуур болох эх орон, хотын хөгжлийн төлөө ажиллах сэтгэл зүтгэлтэй, өндөр ёс суртахуунтай, ажлын дадлага туршлагатай байхаас гадна Монгол Улсын Засгийн газрын “Алсын хараа 2050” хөтөлбөрийг далайцтай хэрэгжүүлж чадах, багаар ажиллах чадварыг суурь шалгуур болгоно. Үндсэн гурван шалгуурыг хангасан хүнийг нээлттэй зарлах болно. Бид богино хугацаанд ажилдаа шуурхайлан орох болно" гэв. 

  Б.Баатар