Амралтын өдөр яаралтай түргэн тусламжийн 103 дугаарт нийт 2465 дуудлага ирснээс 1014 нь яаралтай эмнэлгийн тусламж үйлчилгээ авч, 1451 нь зөвлөгөө мэдээлэл авчээ. Хоногийн мэдээгээр цусны даралт ихсэх 158, хүүхдийн өвчлөл 156, осол гэмтэлтэй холбоотой 187 дуудлага зонхилсон байна.
Эмнэлэгт үзүүлэх цаг захиалах нэгдсэн төвийн 1800-0119 дугаарт 233 дуудлага холбогдож амбулаторын цаг захиалжээ. Мөн 1800-0119 дугаарт хүүхдийн 10 эмч тогтмол мэдээлэл, зөвлөгөө өгч ажиллаж байна.
Бямба гарагт УГТЭ-ийн амбулатор ажиллаж байгаа тул нийт 34 хүн тус амбулаториор үйлчлүүлсний 9 нь хөдөө, орон нутгаас ирсэн байна. ЭХЭМҮТ-д 20 нярай мэндэлж, ГССҮТ-д осол, гэмтлээр 339 хүн үйлчлүүлсэн байна. Амралтын өдөр яаралтай 49, төлөвлөгөөт 1 буюу нийт 50 мэс засал хийгджээ. Төрөлжсөн төв эмнэлгүүдэд нийт 3167 хүн хэвтэн эмчлүүлж байна. Үүнээс 192 нь хөдөө, орон нутгаас ирж үйлчлүүлж байна.
