Төр өмчдөө эзэн суухын тулд “Эрдэнэт үйлдвэр”, “Монголросцветмет”-ийн 49 хувийг авч, ХХК статусыг нь ТӨҮГ болгосон. Төрд очсоноор энэ хоёр байгууллагын ашиг орлого эрс өсч, үр өгөөжөө өгнө гэдэгт олон нийт хүлээлттэй байв. Өнгөрсөн хугацаанд “Эрдэнэт үйлдвэр” нээлттэй ажиллаж, үйл ажиллагаа, ашиг орлогоо ил тодоор тайлагнаж ирсэн бол “Монголросцветмет” ТӨҮГ хаалттай, нууцлаг байдлаар явж ирлээ. Хаалттай бүхний цаана муу бүхэн үүрлэсэн байдаг. Энэ нь ч үнэний ортой юм.

Өнгөрсөн хоёр жилийн хугацаанд Монголросцветмет”-ийн удирдлагууд үйлдвэрээ хөл дээр нь босгохын, үр ашигтай ажиллуулахын тулд юу хийв.

Ямар менежментээр ажиллав. Гэвч тэмтчээд ч, хайгаад ч олсонгүй. Харин ч үйлдвэрийнх нь үйл ажиллагаа нь нэгэнт доголдож, өр ширэндээ баригдаж гүйцжээ.

Тухайлбал, 2020 оны эхний хагас жил буюу нэгдүгээр сарын 1-нээс зургаадугаар сарын 30-ны хооронд буюу зургаахан сарын дотор “Монголросцветмет”-ийн нийт өр 12.5 тэрбум төгрөгөөр нэмэгдэж, 74.1 тэрбум болсон байна.

Урт хугацааны өр төлбөр нь 11.2 тэрбум хэвээрээ, харин богино хугацааных нь 50.3 тэрбум байснаа 62.9 тэрбум болтлоо өссөн байна.

Өр нэмэгдсэн байдлыг нь харвал цалингийн өглөг 400 сая, татварын өглөг 1.5 тэрбум, нийгмийн даатгалын шимтгэлийн өглөг 247 сая, хүүний өглөг 1.1 тэрбум, ногдол ашгийн өглөг 5.2 тэрбум гээд үргэлжилнэ.

“Монголросцветмет” ТӨҮГ-ын захирлаар Батмөнхийн Мөнхбат гэгч эрхэм ажилладаг. Өмнө нь Бор-өндөрийн Уулын баяжуулах үйлдвэрийн захирал байсан түүнийг ТӨБЗГ-ын 2018 оны аравдугаар сарын 29-ний өдрийн А-1/4178 тоот албан бичгээр “Монголросцветмет” -ийн гүйцэтгэх захирлын үүргийг түр орлон гүйцэтгэгчээр томилжээ.

Дараа нь 2019 оны гуравдугаар сарын 21-ний өдрийн Засгийн газрын хуралдаанаас тэр хувийг төрд авч ТӨҮГ болгох шийдвэрийг гаргасан.

Ингэснээр ТӨБЗГ-ын 2019 оны дөрөвдүгээр сарын 2-ны өдрийн 90 дугаар тогтоолоор “Монголросцветмет” ТӨҮГ-ын гүйцэтгэх захирлаар Б.Мөнхбатыг томилсон байдаг.  

Б.Мөнхбат нь тус газрын захирлаар хоёр жил орчим хугацаанд ажиллахдаа хоноцын сэтгэлээр хандаж ирснийг өдрөөс өдөрт өсөн нэмэгдэж буй өрийн баримтууд харууллаа. Төр өмчдөө анхаарах цаг болсныг, удирдлага нэртэй цэвдэг сэтгэлтнүүдийн үйл ажиллагаанд хяналт шалгалт оруулах цаг болсныг энэ бүхэн илтгэж байна.

Тэгээд ч хоёрхон жилийн хугацаанд дааж давшгүй өрөнд орсон учрыг тодруулж, өнөөдрөөс ч болов тус байгууллагын дансаар орж, гарч буй бүх гүйлгээг шилэн болгоё. Ингэж байж л бид төрийн өмчит үйлдвэрийн газраа танагтай дээр нь авч үлдэж чадна.

У.Тэргэл