Нийгэмд үлгэр жишээ болж буй иргэн Д.Батбилэгийг уншигчдадаа танилцуулъя. Тэрбээр хамгийн сүүлд иргэд шөнө оройн цагаар их төөрдөг замд цацруулагч шон байрлуулжээ. Ингээд түүнтэй хэсэг хором ярилцсанаа хүргэе.

-Манай урилгыг хүлээн авсан танд баярлалаа. Явах замын чигийг заасан тэмдэглэгээний цацруулагч бүхий шонгуудыг салсан замуудын уулзварууд дээр байрлуулсан талаарх таны тухай мэдээлэл цахим орчинд тархаж олон нийтийн хүндэтгэлийг хүлээсэн. Нийт хэчнээн зам дээр хэдэн шон байрлуулав?

-Улаанбаатар Дархан хоорондох төв авто замаас Төв аймгийн Жаргалант сум орох асфальтан зам байдаг. Энэхүү хуучин Морин завод гэх газраас салж шороон замаар явсаар Сэлэнгэ аймгийн Орхон сумын нутаг дахь Дархан Эрдэнэтийн төв замтай нийлдэг юм. Энэ хүртэл 80 км үргэлжилдэг. Улаанбаатараас Эрдэнэт хот, Эрдэнэт хотоос Нийслэл орох гэж энэ замаар байнга явдаг. Заримдаа оройтож гарсан үед төөрчих гээд байдаг тохиолдол олон байлаа. Мөн өвөл цас орсон, зун бороо орсон үед явахад хүндрэлтэй. Тиймээс  ч зөв замаа олж явахгүй бол саатах, бэрхшээл ч гарна. Хамаатан садан, найз нөхөд, таньдаг хүмүүст маань ийм зовлон бэрхшээл нэг бус удаа тохиолдож байсныг сонсож байсан. Тиймээс Шар хөтлийн даваагаар зорчих иргэддээ төөрч будлихгүй байхад нь бага ч гэсэн тус болох юм сан гэж боддог байсан. Тиймээс ч үүнийгээ саяхан ажил хэрэг болгон хэрэгжүүлж 12 салаанзамын уулзвар дээр цацруулагчтай шон хатгасан юм. Гэхдээ дахиад ч тийм хэмжээний шон хатгах хэрэгтэй байгаа. Болж өгвөл бичиглэлтэй шон зоовол бүр сайн болох байх.

-Боломжтой бол хэчнээн төгрөгийн зардал гарсныг хэлж болох уу?

-Бусдын төлөө хийж байгаа ажлын үнэ өртгийг тооцдоггүй л дээ. Бусдын төлөө хийсэн буян буцаад баяр баясал болж ирдэгт итгэдэг. 2016 оноос хойш Эрдэнэт хотын оршин суугчид, хүүхэд багачууд, эхчүүдийн төлөө буян үйлдэж тойргийн бүх сургууль цэцэрлэгүүдийг цахилгаан багажаар хангаж, хоёр ч цэцэрлэгийн цайны газрын агааржуулалтын системийг иж бүрэн шинэчилсэн. Мөн Хүүхдийн эмнэлэгтээ эхчүүд хүүхдийн хэвтэх 15 ор, сувилагч нарын хүсэлтээр угаалгын машин, хотынхоо Цагдаагийн газрын Тээврийн цагдаагийн хэсэгт автомашин бэлэглэсэн. Үүнээс гадна хотынхоо эвдрэлтэй авто-замуудад нөхөөс хийх, 800 метр явган замыг өөрийнхөө хөрөнгөөр хийж гүйцэтгэсэн байдаг.

-Таныг “Таван толгой” Цахилгаан станц байгуулах төслийн нэгжийг удирдаж байсныг мэдэх юм байна?

-Таван-толгойн цахилгаан станц бол Монгол улсын эдийн засгийн болон эрчим хүчний аюулгүй байдалд маш чухал нөлөөтэй хөрөнгө оруулалт, бүтээн байгуулалтын том ажил. Энэхүү ажлыг мэргэжлийн чадварлаг аж ахуйн ажил хийж чадах тийм л хүнээр удирдуулж гүйцэтгүүлэх ёстой. Хэрэв өнөөгийн төр засгийн удирдлагад салхи орж байгаа бол улс төрийн томилгоо хийдгээ болих хэрэгтэй. Миний бие 1989-2016 оны 9-р сарыг хүртэлх хугацаанд Эрдэнэт үйлдвэр ХХК-д ажил амьдралаа зориулж ирсэн бөгөөд 2016-2017 онуудад баригдсан энэ компанийн Дулааны станцыг Дулааны цахилгаан станц болгох өргөтгөл шигэчлэлийн төслийн удирдагчаар ажиллаж байгаад ТТЦС төслийн удирдагч буюу нэгжийн захирлаар 2 жил ажилласан.

Эрдэнэтийн станцад 12мВт-н чадал бүхий дөрвөн цахилгаан үйлдвэрлэдэг турбин суурилуулах, хөргөлтийн ус хангамжийн цамхаг, 35кВт-н цахилгаан дэд өртөөний байгууламж, 110кВ-н өндөр хүчдэлийн шугам сүлжээ, Хими ус цэвэрлэгээний цехийн шинэчлэл зэрэг томоохон ажлуудыг Хятадын Харбин хотын эрчим хүчний барилга угсралтын компани гүйцэтгэсэн юм. Би тус компанийн үйл ажиллагаанд өдөр болгон хяналт тавьж 18 сарын хугацаанд барьж байгуулсан байдаг. Энэ барилга байгууламжийн ажил зураг төсөв нь барилга угсралттайгаа бараг зэрэгцээ шахуу явсан тул зайлшгүй хатуу хяналтыг тавихыг амьдрал өөрөө шаардсан юм. Энэхүү ажил бол манай багшийн ОХУ-ын эрдэмтэдтэй хамтарч 2011 онд хийсэн станцыг өргөтгөх ТЭЗҮ-г миний бие багшаасаа зөвшөөрөл авсны үндсэн дээр дахин шинэчлэн ЭХЯ-аар батлуулсан. 1995 онд Техникийн их сургуулийг төгсөх үедээ миний бичсэн дипломын ажил байсан юм. 20 жилийн дараа цаасан дээрх диплом бодит ажил хэрэг болсон ховор тохиолдол шүү.

-Шон байрлуулах болсон нь таны ажил мэргэжилтэй холбоотой юу?

-Би өөрөө дулааны механик инженер мэргэжилтэй, мэргэшсэн инженер, МУ-ын зөвлөх инженер, докторант хүн дээ. Хувиараа барилгын салбарт мэргэжлийнхээ дагуу ажилладаг бөгөөд хотдоо 3-5 барилга байгууламжийг босгох явцад оролцсон байдаг. Хотын ногоон байгууламжид байнга анхаарал хандуулж 5 сая орчим төгрөгөөр ногоон төгөл байгуулж өгсөн. Энэ жил нэмж мод бут сөөг тарина гэж бодоод бэлтгэлээ базааж байна. Намайг манай хотынхон андахгүй дээ. Би хийж бүтээсэн зүйлээ байнга сошиал дээр бичдэг бөгөөд ажлын төлөө төрсөн хүн гэж боддог гэсэн. Хүүхэд байхдаа зуныхаа амралтаар Рот тохижуулах байгууллагад талбайн цэвэрлэгчээр ажиллаж цалингаараа хичээлийнхээ ном сурах бичиг, дэвтэр харандаагаа авдаг байлаа. Багаасаа хөдөлмөрийн амтыг мэдэрч өссөн ба цаашид хотынхоо бодон иргэдийнхээ сайн сайхны төлөө өөрийн чадах бүхнээ зориулна гэж боддог. Цаашлаад улс орныхоо хөгжил цэцэглэлтийн төлөө үлдсэн амьдралаа зориулна.

А.Сүх