Орон нутгийн сонгуульд олонх болсон МАН Хотын захирагчаар УИХ-ын гишүүн Д.Сумъяабазарыг томилохоор санал нэгдээд байгаа билээ.

Түүний сонгогдсон Сонгинохайрхан дүүргийн 28 дугаар тойрогт дахин санал хураалт явуулах хуулийн зохицуулалттай гэдгийг УИХ дахь МАН-ын бүлгийн дарга Д.Тогтохсүрэн өчигдөр мэдээлсэн.

Тэрбээр "Манай намын дүрэмд намын дарга Засаг дарга юм уу Ерөнхий сайд болдог зарчимтай. Гэхдээ олны итгэл авсан парламентын гишүүн Нийслэлийн Засаг даргад нэр дэвшвэл яах вэ гэдэг асуудал байна. Ерөнхий сайд Хотын даргад томилсон шийдвэр гарсан даруйд УИХ-ын гишүүнээс татгалзах өргөдлөө өгнө. УИХ хэлэлцээд мэдээж чөлөөлнө. Улс төрийн шийдвэр гарсан учраас дэмжинэ. Дараа нь нөхөн сонгууль болно. 

Д.Сумъяабазарын "сулласан" 28 дугаар тойргийг улстөрчид онилж эхэлжээ. Хамгийн сонирхолтой нь дээрх тойрогт нэр дэвшиж байсан эрхмүүд дахин өрсөлдөнө гэх мэдээлэл олон нийтийн дунд хөвөрч эхэллээ.

Тодруулбал, 2020 оны УИХ-ын сонгуулиар Сонгинохайрхан дүүргийн 28 дугаар тойрогт нэр дэвшиж, ялалт байгуулсан эрхмүүдийн дараагийн олон санал авсан жагсаалтыг Э.Батшугар, С.Мөнхчулуун нар үргэлжлүүлсэн. Тиймээс тэд дахин өрсөлдөх магадлал өндөр байгаа. Үүнийг үгүйсгэх аргагүй юм.

Монгол Улсын Ерөнхийлөгч асан Н.Энхбаярын хүү Э.Батшугар улс төрд орохыг хүсч буй нь нууц биш. УИХ-ын сонгуулиас мултарч, иргэдийн итгэлийг хүлээж дөнгөөгүй тэрбээр орон нутгийн сонгуульд хүч үзсэн ч мөн л олонхийн санал авч чадаагүй билээ.  

Сонгинохайрхан дүүрэгт хэдэнтээ нэр дэвшсэн тэрбээр олдож буй боломжийг зүгээр орхихгүй гэдгийг хэлэх хүн олон байна. 

2016 оны орон нутгийн сонгуульд Сонгинохайрхан дүүргээс нэр дэвшиж, ялалт байгуулсан Нийслэлийн МАН-ын дэд дарга асан С.Мөнхчулуун энэ жил мөн л тус дүүрэгтээ бие даан нэр дэвшсэн ч сонгогдоогүй. Гэхдээ чамлахааргүй олон хүний санал авсан хүчтэй өрсөлдөгчийн нэг гэдэгтэй маргах хүн үгүй биз.

С.Мөнхчулууныг НИТХ-ын төлөөлөгчөөр ажиллаж байхдаа тойргоо багагүй "усалсан" гэдэг юм билээ. Тиймээс ч ирэх зургадугаар сард болох нөхөн сонгуульд хүч үзэх хүмүүсийн жагсаалтад нэр нь хөвөрч байгаа аж.

Тэдний өрсөлдөгчөөр Ардчилсан намын О.Магнайг нэрлэж байна. 2020 оны УИХ-ын сонгуулиар 28 дугаар тойрогт нэр дэвшиж байсан түүнийг энэ удаа ч мөн тойрогтоо дахин хүч үзэх магадлалтай гэжээ.

Б.Баатар