Нийслэлийн МАН аргагүй л аатай байна. 2012 оноос хойш нийслэлд олонх болж, засаг барьж буй МАН-ынхан эдгээр өдрүүдэд хотыг удирдах хүнээ сонгохоор бужигнаад эхэлсэн. Хотын мэрээр Д.Сумъяабазар, НИТХ-ын даргаар Ж.Батбаясгаланг нэрлээд байгаа. Намын Удирдах зөвлөлийнхөө итгэлийг хүлээсэн тэднийг журмын нөхөд нь батлах нь дамжиггүй. 

Ялсан нь удирдлагыг гартаа авдаг энэ бол эрүүл улс төр. Тиймээс ч Д.Сумъяабазар гишүүнийхээ суудлаас татгалзаж, хотыг удирдахаар болж байна.    

Нийслэлийн МАН-ын дарга асан Ц.Сандуйн удирдсан баг 2012 оны орон нутгийн сонгуульд ялалт байгуулж, олонх болж байлаа.

Гэсэн ч тэрбээр НИТХ-ын дарга болж, "алдсан" гэдэгтэй хэн ч маргахгүй биз. Харин энэ удаа Д.Сумъяабазар түүний алдааг давтсангүй. 

Нөгөөтэйгүүр, ирэх жил болох Ерөнхийлөгчийн сонгуультай холбоотойгоор намын дарга У.Хүрэлсүх ийнхүү Хотын даргад Д.Сумъяабазарыг илгээсэн гэдгийг хэлэх хүн байна. Монгол Улсын хүн амын тал илүү хувь нь оршин суудаг Улаанбаатар хотод асуудал их. Үүнийг шийдвэрлэж, гарц гаргалгааг нь олж чадвал Ерөнхийлөгчийн сонгуульд МАН үнэмлэхүй санал авах нь дамжиггүй. Тиймээс ч дараагийн Ерөнхийлөгчид яригдаж буй У.Хүрэлсүх замаа засуулахаар түүнийг гишүүний суудлаас нь татгалзуулж, хотын дарга руу илгээсэн гэх. 

Ямартай ч, МАН-ын итгэлт хүн гэгдэж буй Д.Сумъяабазарыг хэрхэн ажиллаж, Улаанбаатар хот өнгө засахыг харах л үлдлээ. 

Б.Баатар