Энэ удаагийн Орон нутгийн сонгуулийн дүн гарсны дараа Монгол Улсын хотуудыг хэн удирдах тухай хэлэлцүүлэг улс төрийн хүрээнд ширүүн тэмцэл өрнүүлж байна. Өмнө нь зөвхөн нийслэлийн Засаг дарга бөгөөд Улаанбаатар хотын захирагчийн суудалд хэн очих тухайд олон нийт анхаардаг байсан бол одоо Үндсэн хуулийн өөрчлөлтөөр хотын статусаа сэргээх алхамаа хийсэн Монгол Улсын хоёр дахь том хот Эрдэнэтийн Захирагчийн суудал мөн улс төрийн сонирхолтой өнцөг болов.

Өнгөрсөн бүрэн эрхийн хугацаанд сөрөг хүчний ердөө хоёрхон төлөөлөгчтэй байсан бол шинээр бүрэлдсэн ИТХ-д сөрөг хүчнээс 12 төлөөлөгчийн суудалтай болсноороо онцлог.

Орхон аймгийн Засаг даргын албан тушаалд “Эрдэнэт Ус” ДТС ОНӨХК-ийн дарга асан Д.Бүүвэйбаатар, ЗДТГ-ын дарга Д.Соёлчхүү, ИТХ-ын төлөөлөгч, Хотын захирагчийн албаны дарга асан М.Түмэнжаргал нар өрсөлдсөнөөс гишүүдийн олонх буюу 43 саналаар Д.Соёлчхүү ялалт байгуулсан юм. Ийнхүү МАН-ын Орхон аймгийн хорооны дарга, УИХ-ын гишүүн Д.Батлут найз нөхрийн дотно харилцаатай Д.Соёлчхүүг өөрийн бодлогоор дэвшүүлсэн нь “хотын захирагч”-ийн нэр болж тодроод байсан ч өчигдөр болсон МАН-ын Удирдах зөвлөлийн хуралдаанаар түүнийг дэвшүүлэхийг эсэргүүцсэншийдвэр гарлаа.

Ийнхүү МАН-ын Удирдах зөвлөлийн зөвшөөрөл, Ерөнхий сайдын батламжийг хүлээх нэр дэвшигчийг Эрдэнэт хот хайж байна.

Эх сурвалжийн мэдээлснээр, Орхон аймгийн ИТХ-ын төлөөлөгч М.Түмэнжаргал, “Эрдэнэт үйлдвэр”-ийн орлогч захирал, МАН-ын нарийн бичгийн дарга асан Ц.Бат-Энх нарын нэрс яригдаж байгаа аж. М.Түмэнжаргалын хувьд Эрдэнэт хотын ажил, амьдралыг мэдэх нэгэн боловч түүнд шинэ ИТХ дахь АН-ын 12 төлөөлөгч итгэл үзүүлэхгүй нь тодорхой байгаа юм. Харин Ц.Бат-Энхийн хувьд улс төрийн нөлөө нь нэг намаар хязгаарлагдахгүй, Орхон аймгийн хөгжлийг хот талаас нь харж ажиллах чадвартай хэмээн үзэж байна. Түүнчлэн Ц.Бат-Энх Ерөнхий сайд У.Хүрэлсүхтэй олон жил хамтран ажилласан туршлагатай учраас Засгийн газрын бодлогыг орон нутагт хэрэгжүүлэх ажлыг түүнд итгэж даалгахыг илүүд үзэх магадлал хамгийн өндөр юм.