Б.Хүлгэнд оногдуулсан бүх насаар нь хорих ялыг хэвээр үлдээлээ. Улсын Дээд шүүхийн хяналтын шатны эрүүгийн хэргийн шүүх хуралдаанаар Б.Хүлгэнд холбогдох хэргийг шүүгдэгчийн гаргасан гомдлын дагуу 2020 оны 10 дугаар сарын 23-ны өдөр хянан хэлэлцээд анхан болон давж заалдах шатны шүүхийн шийдвэрийг хэвээр үлдээж шийдвэрлэлээ.

Хэнтий аймаг дахь сум дундын эрүүгийн хэргийн анхан шатны шүүх дээрх хэргийг 2020 оны 6 дугаар сарын 25-ны өдөр хянан хэлэлцээд Б.Хүлгэнийг гэр бүлийн хүчирхийлэл үйлдэж, бага насны хүүхдийг санаатай алсан, хүний эрүүл мэндэд хөнгөн хохирол учруулсан болон хүчиндэх гэмт хэргүүдийг үйлдсэн гэм буруутайд тооцож, бүх насаар нь хорих ял оногдуулжээ. Хэнтий аймгийн Эрүү, иргэний хэргийн давж заалдах шатны шүүх уг хэргийг 2020 оны 7 дугаар сарын 30-ны өдөр хянан хэлэлцээд анхан шатны шүүхийн шийдвэрийг хэвээр үлдээсэн юм.

Хэргийг эргэн сануулахад, Бат-Эрдэнийн Хүлгэн нь 2019 оны 12 дугаар сарын 20-ны өдөр өөрийн дагавар хүү болох 3 настай хүүг онц ноцтойгоор зодож, амь насанд нь хүрсэн хэрэг гарсан билээ. Шүүгдэгч Б.Хүлгэн нь 1996 онд төрсөн 2013, 2015, 2017, 2018 онд хулгай, дээрэм, хүчингийн хэргээр нийт зургаан удаа ял эдэлж байсан нэгэн юм. Тэрбээр 2019 оны зургаадугаар сард хорих ангиас суллагдсан бөгөөд аравдугаар сараас талийгаач хүүгийн ээжтэй хамтран амьдарч байсан аж. Харин тэрбээр амьдарч эхэлсэн цагаасаа талийгаач хүү болон түүний дүү нэг ой гурван сартай хүүг хүчирхийлдэг байсан байна. Шүүх эмнэлгийн дүгнэлтээр хүүгийн элэг бяцарсан учир үхлийн шалтгаан болсон гэж үзжээ. Мөн бага дүүг нь мөн хүчирхийлдэг байсан нь тогтоогдсон юм. 

Б.Баатар