Баянгол дүүргийн ИТХ-ын сонгуулийн 23 дугаар тойрогт МАХН-аас нэр дэвшин сонгогдсон Э.Магнайбаярт сонгогчид нь итгэл үзүүлэн, төлөөллөөрөө сонгосон. Гэвч баярласан хэрээр бархирна гэгчээр нөгөөх нь хэд ч хонолгүй урваж, шарвасан нь олон хүнийг “шок”-нд оруулсан. Ялангуяа МАХН-ын нөхөд тэр дундаа намын дарга Н.Энхбаярын хувьд хүнд цохилт болсон нь тодорхой.

УИХ-д нэг суудалтай тус нам  орон нутгийн сонгуульд мөн нэг суудалтай боллоо хэмээн баярлаж байсан нь талаар болсонд эгдүүцэж, бухимдсан тэд Э.Магнайбаярыг огцруулах, эгүүлэн татуулахын төлөө бүхнийг хийж байна.

Анх өндөг шидэж, гурил цацаж, чирч гулдран зодох нь холгүй байсан эсэргүүцэгчид өдгөө Э.Магнайбаярыг сонгогчдын итгэлээр улс төрийн наймаа хийсэн хэмээн буруутган, дахин санал хураалт явуулж өгөхийг хүсч, эл асуудлыг холбогдох хуулийн байгууллага зохих журмаар нь шийдэхгүй бол суулт зарлана гэдгээ ч мэдэгдээд байгаа юм.  

Нийслэлийн МАХН-ын хорооны дарга Э.Эрдэнэжамьян “Э.Магнайбаяр гэдэг хувь хүнийх нь талаар яримааргүй байна. Уг нь мэдлэгтэй, сайн залуу. Гэхдээ МАН-д элсэх болсноо урьдчилж хэлээгүй нь бидэнд маш гэнэтийн цохилт болсон. Олон хүний эгдүүцлийг хүргэж байна. Ер нь иргэдийнхээ эсрэг хийж буй гэмт хэрэг” хэмээсэн билээ.

Гэхдээ энэхүү тэмцэл, хэрүүл, зодооны цаана мэдээж МАХН-ын дарга, Ерөнхийлөгч асан Н.Энхбаяр байгаа. Тэрбээр тэсэрч дэлбэртлээ уурлаж, намаас нь, өөрөөс нь урвасан Э.Магнайбаярыг огцруулж, улс төрөөс арчиж, хэн ч биш болгож байж түүний “өс” тайлагдах биз ээ.

У.Тэргэл