Аймаг, дүүргийн ИТХ-ын сонгуулиар МАН Нийслэлийн ИТХ-д үнэмлэхгүй ялалт байгуулж, ирэх дөрвөн жилд Улаанбаатар хотыг дахин удирдахаар болсон.  АН ч чамлахааргүй амжилт үзүүлж, нэг дүүрэг, 9 аймагт ялалт байгуулсан билээ.

Тухайлбал,  Увс аймагт АН-19, МАН-17 суудал авсан бол таван бие даагч мөн сонгогдсон юм. Эх сурвалжийн хэлж буйгаар, бие даагч таван гишүүнийг АН, МАН өөртөө элсүүлэхээр өөр өөрсдийн саналыг тавьжээ.

МАН-ын зүгээс аймгийн Засаг дарга, ИТХ-ын дарга гэхчлэн албан тушаал санал болгосон ч бие даагчид  илүү ихийг хүссэн гэсэн мэдээлэл байна.

Хамгийн гол нь, бие даагч гишүүдийн улс төрийн  шийдвэрээс ирэх дөрвөн жилд АН, МАН-ын аль Увсад засаглах нь тодорхой болох юм.  Ямартай ч, тус аймгийн ИТХ-д сонгогдсон хоёр намын гишүүд болон таван бие даагч тал талд хуралдан, эцсийн шийдвэрээ гаргахаар зөвлөлдөж байгаа аж.

У.Тэргэл