Чуулганы хуралдаанд УИХ-ын гишүүн Б.Энхбаяр “МАН-ын 100 жилийн түүхт ойд тус намыг удирдан чиглүүлж байсан үе үеийн Ерөнхий сайд, УИХ-ын дарга нар байхгүй нь. У.Хүрэлсүх л үлдлээ” хэмээн тодотгосон. Үнэхээр л 2021 оны гуравдугаар сарын 1 буюу Эх орончдын өдрөөр МАН-ын төрсөн өдөр буюу түүхт 100 жилийн ой тохионо.

Гэвч намынхаа түүхт 100 жилийн ойн арга хэмжээний хүндэтгэлийн суудалд залрах учиртай эрхмүүдийн зарим нь шоронд ял эдэлж, зарим нь шүүхийн хаалга татах гэж буй нь харамсалтай.

Тодруулбал, Ерөнхий сайд, УИХ-ын гишүүн асан С.Баяр, Ж.Эрдэнэбат нар  албан тушаалын хэрэгтээ хорих ял эдэлж байгаа бол гишүүн Сү.Батболдтой холбоотой гомдлыг Иргэний хэргийн шүүх удахгүй хэлэлцэх сураг байна. Мөн УИХ-ын дарга асан, МАН-ын даргын албыг олон жил хашсан М.Энхболдод холбогдох “60” тэрбумын гэх хэргийг сэргээн шалгаж эхэлсэн гээд тус намын лидерүүдтэй холбоотой хар бараан мэдээлэл хөврөх болсон.

Энэ байдлаараа Сү.Батболд, М.Энхболд нар ч “аав”-ын хаалга татаж болзошгүй нөхцөл байдал үүсчихээд буй. Энэ бүгдээс харахад эрх баригч хүчин МАН У.Хүрэлсүхээс өөр лидергүйгээр100 жилийн төрсөн өдрөө тэмдэглэх болох нь.

Эргэн харахад, үе үеийн Ерөнхий сайд нарт төр их л халгаатай явж иржээ. 

Ерөнхийлөгч асан, МАХН-ын дарга Н.Энхбаяр эрх мэдлээ урвуулсан болон албан тушаалын хэрэгтээ хорих ял эдэлсэн бол дээр хэлсэнчлэн, С.Баяр, Ж.Эрдэнэбат нар ялаа эдэлж буй.

Мөн Сү.Батболдыг шалгаж байгаа бол Ч.Сайханбилэгийг эрэн сурвалжилж буй гээд үе үеийн Ерөнхий сайд нар түүхэнд “хар толбо” үлдээсэн. Үнэхээрийн тэд  ард түмнийхээ төлөө шийдвэр гаргасныхаа төлөө яллуулсан уу, эрх ашигтаа хөтлөгдсөн үү гэдгийг цаг хугацаа шүүх биз ээ.

У.Тэргэл