Жил бүрийн төсвийг арваннэгдүгээр сарын 15-ны дотор багтаан хэлэлцэж, батлах хуультай. Энэ дагуу ирэх оны төсвийг батлахад ердөө хоёр долоо хоногийн хугацаа үлдлээ. Гэтэл чуулганы нэгдсэн хуралдаан өнөөдөр хуралдахгүй. Ажлын хэсэгт багтсан зарим нь ажиллаж, зарим нь “амарна”. Үүнтэй холбогдуулан давчуу хугацаанд батлагдсан төсөв болох нь гэж шүүмжлэх эдийн засагчид цөөнгүй байна.

2021 оны улсын нэгдсэн төсвийг Засгийн газраас 2.1 их наядын алдагдалтай оруулж ирсэн. Тэгвэл алдагдалтай төсвийг гишүүд аль болох бууруулах талаас нь анхаарч ажиллаж байгаа гэсэн юм.

Гэвч төсвийн зарлагаа бууруулах, чуулганы хуралдаанаа алгасахгүй байхыг шаардах сөрөг хүчин ч алга. Гишүүдийн үндсэн ажил бол хуулийн төсөл санаачлах, батлах. Үүргээ умартсан тэд хаана, юу хийж явна вэ.

Саяхан орон нутгийн сонгууль гэж хөөрцөглөж, тойрогтоо ажиллах нэрээр нэр дэвшиж байгаа намын нөхдөө дэмжиж цаг алдсан. Улмаар хэд хэдэн байнгын хороод ч хойшилсныг маргаагүй байх. Угтаа бол төсөв батлах хугацаанаас тулсан энэ үед эрвийх дэрвийхээрээ ажиллаж байх цаг нь шүү дээ. Тэд хайчив.

А.Сүх