Гадаадын иргэн харьяатын газрын даргын үүрэг гүйцэтгэгчээр ажиллаж байгаад тус газрын даргын албыг хаших болсон хурандаа Д.Мөрөн нүдээ аньж, чихээ бөглөсөн байв уу гэж асуумаар байна. Түүний даргаар ажиллаж байсан дөрвөн жилийн хугацаанд хууль бус үйлдэл газар авч, Монголд оршин суугаа гадаадын иргэд ч дураараа дургиж ирснийг ГИХГ-ын одоогийн дарга Ууганбаяр илчиллээ.

Тэрбээр баримт нотолгоотойгоор асуудлыг гарган тавьж, дотоодын хяналт шалгалтаараа илрүүлсэн хэргүүдээ ч дэлгэлээ. Гэтэл энэ үед Д.Мөрөн дарга юу хийж байв гэж хэн бүхэн асууж байна.

Ажилчид нь гадаадын иргэдийн хууль бус үйлдлийг хайцаалж, бүр зохицуулж өгье хэмээн авлига нэхдэг. Гадаадын иргэд ямар ч бичиг баримтгүйгээр олон арван жил Монголд ажиллаж, амьдарч ингэхдээ алхам тутамдаа хууль тогтоомжийг зөрчиж байсан нь ил боллоо.

Хөрөнгө оруулагч нэрийдлээр орж ирээд нэг ч төгрөгийн татвар улсад төлдөггүй, хуурамч бичиг баримттай гадаадын иргэд хууль бусаар мөрийтэй тоглоомын газар ажиллуулдаг гээд тоочвол дуусахгүй. Мөн улсад төвлөрүүлэх байсан нэг тэрбум төгрөгийг Д.Мөрөн дарга үл хайхарсан байх юм.

Хурандаа Д.Мөрөн цагдаа, хууль хүчний байгууллагад 30 орчим жил ажиллахдаа юу хийв. Тэрбээр С.Зоригийн амийг хөнөөсөн хэргээр л “шоудаж” ирсэн. Илрүүлнэ хэмээн удаа дараа амалж байсныг санаж байна. Харин ГИХГ-ын даргын албан тушаалыг хэрхэн хашсан болохыг дээр хэлсэн. Ийм хүнийг ГИХГ-ын дэд даргаар томилдог нь анхаарал татаж байгаа юм.

У.Тэргэл