Самар түүгээд буцаж байсан иргэд өндөр хавцал руу автомашинтайгаа унасан ноцтой осол Төв аймагт гарчээ. Энэ тухай дуудлага Төв аймгийн Онцгой байдлын хэлтэст аравдугаар сарын 29-ний 01 цаг орчим ирсэн бөгөөд албаныхныг газар дээр нь очиход олон хүн бэртэж, гэмтсэн.

Нэг хүн амиа алдсан байдалтай байжээ. Энэ талаар эх сурвалж “ Төв аймгийн Батсүмбэр сумын Цогт-Өндөр багийн Өлгийн даваа нэртэй газарт энэхүү ноцтой осол гарсан. Сэлэнгэ аймгийн харьяат Л-ийн жолоодож явсан “Зил-131” ачааны автомашин 60 метрийн өндөр хавцал руу унаж, тус автомашинд явсан 11 иргэний  дөрөв нь эсэн мэнд гарсан.

Мөн зургаан хүн бэртэж гэмтэн, нэг хүн амиа алдсан” гэв. Онцгой байдлын албаныхан гэмтэж, бэртсэн иргэдийг аймгийн нэгдсэн эмнэлэгт хүргэж, 36 настай Г-ийн цогцсыг Төв аймгийн Батсүмбэр сумын цагдаагийн хэлтэст шилжүүлэн өгсөн байна. Урьдчилсан байдлаар, “Зил-131” автомашины тоормос ажиллахаа больсон талаар хэлж байна. Гэвч нарийвчилсан шалгалтаар шалтгааныг нь эцэслэн тогтоох юм байна.