Хэдхэн хоногийн өмнө УУХҮ-ийн сайд Г.Ёндон "Монголросцветмет" ТӨҮГ-ын орлогч захирлаар ажиллаж байхдаа албаны 10.7 сая төгрөгөөр хоёр хүүхдийнхээ сургалтын төлбөрийг төлүүлсэн асуудал нийтэд ил болсон талаар бид өмнө нь мэдээлж байсан. Эрхэм сайдад Ерөнхий сайд У.Хүрэлсүхийн шударга ёсны “сэлэм” даанч хүрэлгүй өдийг хүрч байна.

Тэр төрийн сайдаас илүү “Ёндон” нэрээрээ хочлогдож, олны зугаа болж явна. Зугаа ч юу байхав олныг тавласных нь л хариу шүү дээ. Эрхэм сайдын эл асуудал намжаагүй байхад төрийн өмчийн газрын хөрөнгөөр хүүхдийнхээ сургалтын төлбөрийг төлсөн дахин нэг асуудал дэлслээ.

Тодруулбал, Эрдэнэт ТӨҮГ-ын Ерөнхий захирал Х.Бадамсүрэн охин Б.Буянжаргалын сургалтын төлбөр болох 102.385.101 төгрөгийг байгууллагын мөнгөөр төлсөн баримт шилэн дансны мэдээллээр ил болох нь тэр. Тэрбээр охин Б.Буянжаргалын сургалтын төлбөрийг Канадын Торонтогийн их сургууль руу шилжүүлжээ.

Ёстой л” төрийн мөнгө уйлдаггүй” юм байна.

Хумсалсаар хумсалсаар хулгайч гэдэг шиг төрийн дээр, доор гэлтгүй шатны алба хаагчид аль “тухалсан” газартаа өөрийн чадах чинээгээр долоох нь долоож, халбагадах нь халбагадаж, шанагадах нь шанагаддагийг харуулав.

Төрийн мөнгөөр дураараа дургидаг, эзэн суудаг дараагийн “баатар” хэнээр үргэлжлэх вэ. Ийм хүлээлт ч нийгэмд бий болсон нь нууц биш ээ.

Б.Лхам