Э.Бат-Үүлийг Хотын даргаар ажиллаж байх үеэс хотын автобусуудад карт уншдаг төхөөрөмж тавигдаж, иргэд автобусаар карт уншуулж зорчдог болсон.

Ингэж зорчдог  болоод тав, зургаан жил болж байна.

Тухайн үедээ яалт ч үгүй шинэ соргог үйлчилгээ байлаа.

Өнөөдөр автобусаар зорчдог хүмүүс карт хэрэглээд сурчихсан. Автобусанд кондуктор байхгүй болсон.

Үндсэндээ гурван жил орчмын хугацаанд энэ бүхэн хийгдэж дууссан. Иргэд хэрэглээд сурчихсан гэсэн үг.

Энэ хоорон төслийг хэрэгжүүлэгч “Улаанбаатар смарт карт” ХХК автобусанд төхөөрөмж суурилуулж, картаар хангаж, карт борлуулах цэгийг байгуулснаас хойш шинэ соргог технологи нэмж хэрэгжүүлсэнгүй.

Нийслэлийн нийтийн тээврийн газрын данс тооцоог харвал “Улаанбаатар смарт карт” ХХК руу урсдаг мөнгөний тоо их харагддаг.

Үүнтэй зэрэгцээд сүүлийн үед нийтийн тээврийн шинэчлэл дахин яригдаж эхлээд байна.

Мэдээллээс харахад “Улаанбаатар смарт карт” ХХК ажлаа хийчихсэн, одоо ашгаа авах гээд хүлээж суудаг гэх...

Энэ мэдээллийн үнэн бодит эсэхийг тус компанийнхан өөрсдөө тайлбарлах биз ээ.

Гэхдээ жил гаруйн өмнө “Улаанбаатар смарт карт” ХХК-ийн ерөнхий захирал Шин Дун Вү дээрх мэдээллийг баталсан агуулга бүхий яриаг манай улсын хэвлэлүүдэд өгч байсан. Тэрээр “Анх “Дата карт консерциум” нэрээр дөрвөн компани хамтарч сонгон шалгаруулалтад орж,  шалгарснаар Улаанбаатар хоттой хамтарсан “Улаанбаатар Смарт Карт” ХХК-ийг байгуулан үйл ажиллагааг нь эхлүүлсэн. “Корей Смарт Карт” корпорацийн хувьд бүтэц, үйл ажиллагааны хэлбэр нь “Улаанбаатар Смарт Карт” ХХК-тай адилхан бөгөөд БНСУ-д төдийгүй дэлхийн цөөнгүй хотуудад нийтийн тээвэр, автобус, такси, метро зэрэг тээврийн төлбөр тооцооноос гадна програм хангамж, жижиглэн худалдаа, бусад төлбөр тооцоог хариуцан ажилладаг байгууллага юм. “Корей Смарт Карт” корпорацийн 36 хувийг Сөүл хотын захиргаа эзэмшдэг бөгөөд үүгээрээ оролцоо, хяналтаа тавьж ажилладаг.

“Улаанбаатар Смарт Карт” ХХК-ийн хувьд хоёр орны хотуудын хамтын ажиллагааны үндсэн дээр үүсгэн байгуулагдсан компани. “Улаанбаатар Смарт Карт” ХХК-ийн 55 хувийг “Корей Смарт Карт” корпораци, 16 хувийг “Дата карт консерциум”-д оролцсон бусад Монгол компаниуд, 5 хувийг “ZEUS” компани, 24 хувийг Нийслэлийн Засаг даргын тамгын газар эзэмшдэг. НЗДТГ-ын хувьд ТУЗ-д хоёр төлөөлөлтэй бөгөөд үүгээрээ компанийн үйл ажиллагаа, засаглалд хяналт тавьдаг. Улаанбаатар хот хувьцаа эзэмшигчдийн хурал болон ТУЗ-ийн хурлаар компаний үйл ажиллагаа, санхүүгийн бүхий л мэдээллийг авч, хянаж ажилладаг” гэж ярьж байв.

Шин Дун Вү бас “Бид мастер гэрээнийхээ дагуу үйл ажиллагаагаа явуулж, гүйцэтгэлүүдээ хангаад явж байна. Тухайлбал, “Удирдлага мэдээллийн болон цахим төлбөрийн систем” төслийг хэрэгжүүлэх мастер гэрээгээр нийт 500 байршилд цэнэглэх цэг байгуулахад хангалттай гэж тусгасан байдаг. Гэвч иргэдийн зорчих эрэлт, хүндрэл багатай үйлчлүүлэх нөхцлийг сайжруулах зорилгоор бид өнөөдрийн байдлаар 552 орчим борлуулах, цэнэглэх цэгийг ажиллуулж байна. Энэ ондоо багтаад карт цэнэглэх цэгийн тоогоо 650-д буюу 30 хувиар нэмэгдүүлэх  зорилт тавьж байна. Мөн бидний нэг үүрэг бол нийтийн тээврийн зорчилтын тоо, орлогыг бүртгэх зэрэг холбогдох мэдээллийг /дата/ цуглуулах, бүрдүүлэх ажил юм. Өнөөдрийн байдлаар датаг 99.9 хувьтай бүрдүүлээд байна. Уг дата буюу мэдээллийн баазыг Улаанбаатар хот руу шууд тайлагнаж, мэдээллэдэг. Бүрдүүлсэн датаг ашиглан Улаанбаатар хот бодлогоо тодорхойлж, хэрэгжүүлээд явах ёстой юм” гэж байлаа.

Тэгвэл энэхүү “Улаанбаатар смарт карт” ХХК-ийн хувьцааг хэн хэн гэдэг эрхмүүд эзэмшдэг вэ гэдэг анхаарал татаж байгаа юм.

Баримтаас харахад “Улаанбаатар смарт карт” ХХК нь 2014 оны 11 дүгээр сарын 27-нд БНСУ-ын хөрөнгө оруулалттайгаар байгуулагдаж байжээ. Монгол улсын нутаг дэвсгэрт интернэтэд суурилсан хот, хот хоорондын ярианы үйлчилгээ, Программ хангамжийн үйлчилгээ, Маркетингийн зөвлөгөө өгөх, Интернетийн үйлчилгээ, Гадаад худалдааны чиглэлээр үйл ажиллагаа явуулах эрхийг авчээ.

Тус компанийн ерөнхий захирал нь дээр танилцуулсан БНСУ-ын иргэн Шин Дун Вү юм байна.

Түүнийг “Улаанбаатар смарт карт” ХХК 55 хувийг эзэмшдэг “Корей Смарт Карт” корпорациас томилсон аж.

Үлдэх 45 хувийн 16 хувийг “Дата карт консерциум”-д оролцсон бусад Монгол компаниуд буюу “Дундговь энержи”, “Нама-Оч”, “Migration-Р” хэмээх компаниуд,  5 хувийг “ZEUS” компани, 24 хувийг НЗДГ эзэмшдэг байна.

“Корей Смарт Карт” корпораци нь мэдээж хэрэг БНСУ-д бүртгэлтэй.

Үлдсэн хувийг эзэмшдэг компаниуд нь манай улсад бүртгэлтэй байна.

Гэхдээ 5 хувийг эзэмшдэг “ZEUS” компанийн захирал нь БНСУ-ын иргэн Ли Мин Вү гэдэн хүн байдаг аж. БНСУ-ын хөрөнгө оруулалт бүхий энэ компани 2013 оны 4 дүгээр сарын 22-нд Хүнд машин, механизмийн засвар үйлчилгээ, Интернетийн үйлчилгээ, Гадаад худалдааны үйл ажиллагаа явуулах чиглэлтэйгээр байгуулагджээ.

Харин 16 хувийг нь хувааж эзэмшдэг компаниудын нэг болох “Дундговь энержи” ХХК нь өдгөө "Улаанбаатар смарт карт” ХХК-ийн гүйцэтгэх захирлаар ажилалж байгаад одоо ТУЗ-ийн дарга болсон Б.Мөнхболорын эзэмшлийнх юм байна. Б.Мөнхболорын энэ компани Гадаад худалдаа, Сэргээгдэх эрчим хүчний тоног төхөөрөмжийн худалдаа эрхлэх эрхтэйгээр 2016 оны 9-р сарын 27-нд байгуулагдсан байна.

Мөн “Нама-Оч”ХХК нь Шадар сайд Я.Содбаатартын ах Я.Сод-Эрдэнэтэй холбогддог. Тодруулбал, дээрх “Нама-Оч” ХХК-ийг эзэмшдэг “Голден прима” ХХК-ийн захирал нь Я.Сод-Эрдэнийн хүү Хас-Очир юм. Өнөөдөр Хөгжлийн банкны тэргүүн дэд захирлаар ажилладаг Я.Сод-Эрдэнэ нь “Улаанбаатар смарт карт” ХХК-ийг анх байгуулагдаж байхад гүйцэтгэх захирал, бас ТУЗ-ийн дарга нь байсан.

Харин “Улаанбаатар смарт карт” ХХК-ийн бас нэг хувьцаа эзэмшигч “Migration-Р” гэх хуулийн этгээд нь эзэн нь тодорхойгүй ч Монголын олон компанийн хувь эзэмшигч хэмээн бүртгэгдсэн байдаг юм байна.