Эрүүл мэндийн яамнаас 17 цагийн ээлжит мэдээллээ хийж байна.

ЭМЯ-ны хэлтсийн дарга Д.Нарангэрэл "Дэлхий дахинд коронавирус эхэлж байх үед хатуу хөл хорионы дэглэмийг олон орон хэрэгжүүлж, үр дүнд хүрсэн. Шинэ Зеланд, Австрали, Герман, БНХАУ гэх мэт орнууд тодорхой хугацаанд, зарим нь 2-3 сар хөл хорио тогтоож байж өвчний тархалтыг таслан зогсоосон. Ялангуяа, Шинэ Зеланд улс коронавирусний халдвар бүртгэгдэж байх үед тархалтыг хумих зорилгоор хатуу хөл хорионы дэглэмийг сайтар хэрэгжүүлсний үр дүнд богино  хугацаанд дэгдэлтийн оргил үеийг даван туулсан. Манай улсын хувьд 14 хоногийн хугацаанд хатуу хөл хорионы дэглэмийг тогтоосон бөгөөд иргэд сайн биелүүлж байна.

Хэрэв хатуу хөл хорионы дэглэмийг хэрэгжүүлээгүй бол одоо илэрч байгаа өвчлөлийн тоо 4-5 дахин өндөр байх магадлалтай байсан. Энэ өвчлөлүүдийг тандан судлаад, хүмүүсийг тусгаарлаад, хавьтлуудыг илрүүлэн тусгаарлаж, олон хүнийг шинжилгээнд хамруулах арга хэмжээ авснаар өнөөдөр бид өвчлөлөө тодорхой хэмжээнд бууруулж, барьж байна. 

Тиймээс иргэд та бүхэн бидний зөвлөмжийг аль болох хэрэгжүүлэх үнэхээр шаардлагатай байна. Тэгж чадвал бид цар тахлыг хохирол багатай даван туулах боломж байна" гэдгийг онцоллоо. 

ХӨСҮТ-ийн Тандалт, судалгааны албаны дарга А.Амбасэлмаа "11 цагаас хойш дөрвөн тохиолдол нэмэгдлээ. Тодруулбал Замын-Үүд сумаас нэмж дөрвөн тохиолдол илэрлээ. Тус аймагт нийт 16 тохиолдол бүртгэгдлээ. Харин дотоодын халдвар 146 боллоо. Тодруулбал, Улаанбаатарт 38, Сэлэнгэ аймагт  58, Дорноговь аймагт 16, Орхон аймагт  17, Говьсүмбэр аймагт 1, Дархан-Уул аймагт 16 тохиолдол бүртгэгдээд байна. Харин нийт коронавируний батлагдсан 582 тохиолдол болж, үүнээс 337 хүн эдгээсэн.

Анх халдвар бүртгэгдсэнээс хойш 12 хоног өнгөрч байна. Тэгэхээр нууц үеийн хугацаа дуусах ойртож байна. Гэсэн ч шинэ халдварууд өдөр бүр бүртгэгдэж байгаа учир цаашид халдвар хамгааллын дэглэм үргэлжлэх болно" гэлээ.

Б.Баатар